qummoroortartut
Qummoroortartut unioqqutitsilluni toqqortat politiit inuttassarsivaat
Nuummi umiarsualivimmi containerini pingasuni unioqqutitsilluni tonsinik arlaqartunik toqqortaqarsimasoq, politiit inuttassarsivaat.
- Qummoroortartunik nutaanngitsunik piginnittoq apersorparput, Nuummi politiineersoq, Mads Lynge, Sermitsiaq.AG-mut taama oqarpoq.
Tillitaanngitsut
Qummoroortartut siorna annertuumik tillinniartoqarneraneersuunngitsut politiit oqaatigaat.
- Qummoroortartut sinneruttut tunineqanngitsoornikuninngaanneerneri ilimagaarput, Mads Lynge oqarpoq.
Qummoroortartunik piginnittoq malittarissassat malinnagit toqqortaateqarsimasoq qanoq qisuariarfigineqarnissaa pillugu paasiniaaleruttorput.
Imaarsineq
Nuummi Qeqertani Nuuk Imiup tunuani containereqarfiup imaarneqarneranut atatillugu containerit pingasut qummoroortartunik annertuunik Kommuneqarfik Sermersuup sulisui nassaarput.
- Qummoroortartunik toqqortaateqarneq inerteqqutaalluinnarpoq. Qummoroortartut taama annertutigisut sumiiffimmi inunnik sulisunik aammalumi innuttaasunut annertuumik navianartorsiortitsipput. Ikuallattoqalissagaluarpat qummoroortartut annertuumik qaartoorutaasinnaapput, Sanarfinermut Avatangiisinullu Ingerlatsivimmi immikkoortortami aqutsisoq Vilhelm Lynge Hard, taama oqarpoq.
Aamma atuaruk: Qummoroortartut tonsit arlallit containerini nassaarineqartut
Siunissami qummoroortartunik nassaartoqartillugu taakku aamma politiinut nalunaarutigineqartassasut, kommuni tusagassiuutinut nalunaarummini ilisimatitsivoq.