Maarmorilik
Qulimiguullip nakkarneranit nalunaarusiaq ukiuni tallimani suliarineqartoq
Qulimiguulik qaarsup sinaatigut Maamorilimmi 2007 nakkarpoq. Nalunaaruasiaq Havarikommissionep pisortaanit suliarineqartoq ukiut tallimat qaangiummata aatsaat piareerneqarpoq
2007-mi aasaanerani Air Greenlandip qulimiguuisa ilaat qaarsoq sinerparlugu nakkarpoq. Taanna sannerluni tasermut meterinik marlunnik ititigisumi Uummannap eqqaani piiaafimmi Maarmorilimmi pivoq.
Nakkarnermi ilaasut piloterlu annnertunerusumik ajoqusinngikkaluartut Havarikommissionip ukiut tallimat qaangiummata nakkarnermut suna pissutaanersumut nalunaarusiaq aatsaat saqqummersippaa.
Danskit nutaarsiassaqartitsiviat Berslingske sapaatiummat taama allaaserisaqarpoq.
Atuaruk: Qulimiguulik Maarmoriliup eqqaani nakkartoq
Naliginnaanngitsumik sivisuvoq
Nalunaarusiorneq ukiup ataatsip ingerlanerani piareerneqartaraluartoq uani pisumi Havarikommissionip sivisunerusumik suliarisimavaa. Nutaarsiassaqartitsiviullu Berlingskep paasisai naapertorlugit Havarikomissionimi naalakkap Martin Puggardip suliarisimavaa.
Taassuma Maarmorilimmi ajutoorneq misissuiffiginagu pilotip nassuiaassinera kisiat tusarniarsimavaa. Taamaattoqarneranilu pisimasoq iluamik paasiniaaffigineqarsimanngilaq.
Taamaakkaluartoq Martin Puggaardip ukiut tallimat nalunaarusiaq quppernernik marlunnik takissuseqartoq suliarisimallugu.
Vaajari kiggigussimavoq
Vaajari qulimiguulimmut ikkusimasoq pilotip arakutsisimagaa naluanaarusiami allassimavoq.
Qulimiguulillu qangattarmat vaajari ungalunut atasup suluusaq nusussimavaa suluusallu aappaa innarlerlugu.
Martin Puggaard sulisunut Havarikommisionimullu pisortaasup nammineq nalunaarusiaq suliarisimavaa.
Ittumut isornartorsiuineq
Maarmorilimmi qulimiguullip ajutoornera Havarikommissionimi sulisuni isornartorsiorneqarpoq. Ajutoornermi paasiniarneqartussat Martin Puggaardimit iluamik paasiniarneqarsimannginnerarlugit. Inspektørillu suliai inernileruminaatsissimagai inspektøriusup allap isornartorsuiorpaa.
Martin Puggaardip sillimaniarnermut siunnersuutit nalunaarusiamit peersimammagit naak havariinspektørip peeqqunngikkaluaraa suleqatigiit iluanni sakkortuumik aaqqiaginngiissuteqartoqarsimasoq Berlingske Business-ip siornatigut allaaserereerpaa.
Martin Puggaard nipangersimasussaatitaanini pissutigalugu pisumut oqaaseqarumanngilaq.
Martin Puggaard timmisartunut mekanikerisut ukiut sisamat ilinniareerluni SAS-imi ukioq ataaseq sulivoq. 1999-ilu Havarikommissionimiilerluni, 2011-milu ittunngorluni.