Qulimiguulik Maarmoriliup eqqaani nakkartoq
Qulimiguulimmi aquttoq ilaasorlu annaanneqarput.
Nalunaaqutaq 10.20 Air Greenlandip qulimiguuliutaa mikisoq AS 350 Maarmoriliup avataani imaanut nakkarpoq. Qulimiguulimmiipput ilaasoq ataaseq aquttorlu, taakku tamarmik annaanneqarput. Ilaasoq annikitsumik ajoqusersimavoq aquttorlu tuparujussuaqqalluni.
Nakorsaq ikiortaalu politiillu qulimiguulimmik Bell 212-imik Maarmorilimmut apuuteqqammerput.
– Ajuttorneq sumik peqquteqarnersoq misissussavarput, Jørgen Erik Andersen Air Greenlandimi timmisartuussinermut ingerlatsivimmeersoq oqarpoq.
Ajuttorneq Maarmoriliup mittarfianiit tingisimatsiaannarluni pivoq. Qulimiguulik qaqqap Inngili Qernertup misissuilluni qilleriffiusup tungaanukaraluarpoq. Qulimiguulik sinerissamiit 200-300 meterinik ungasissusilimmiilluni imaanut tassanngaannaq nakkarpoq.