qamuteralaat
Qamuteralannut malittarisassanut nutaanut 18-t maalaaruteqarsimapput
Kommuneqarfik Sermersuumi qamuteralannik angallannermut killilersuinissamut tunngasumut kommunip pilersaarutaanut maalaaruteqarnissamut killigititaq ippassaq qaanngiuppoq.
Pilersaarut tusarniarneqartussanngortinneqarmat ingerlaanna nittartakkakkut attaveqaqaqitigiittarfitsigut annertuumik akerlilerneqarpoq. Tamanna minnerunngitsumik qamuteralannik nuannarisallit kommunimi sumiiffinni annertoorujussuarni angalaaqqusaajunnaarnissaat paasisinnaannginnamikku.
Tusarniaanermut akissutit misissorneqartut
Pilersaarusiornermut immikkoortoqarfiup tusarniaanermut akissutit tamarmik maanna misissorneqassasut, pilersaarusiornermut pisortaq Bilo Høegh Stigsen ilisimatitsivoq.
- Imaassinnaasoq tusarniaanernut akissutit malillugit allannguisut aamma aaqqiissuteqalaartugut, pilersaarusiornermut pisortaq Sermitsiaq.AG-mut nassuiaavoq. Maalaarutit tunngavilersuutaallu tassani apeqqutaassapput.
Maalaarutit tamarmik suliarineqarlutillu nalilerneqareerpata immikkoortoqarfik kommunalbestyrelsimut siunnersuuteqassaaq, tassani politikerit nalunaarutip inerneranik aalajangiisuussaapput.
Aamma atuaruk: Qamuteralannut malittarisassat nutaat kamaatigineqartut
Arpiilip sisamaanni kommunimut qinersisoqarnissaa pissutigalugu qamuteralaat pillugit nalunaarut nutaaq juunimi atuutilissasoq pilersaarusiornermut pisortap naatsorsuutigaa.
Siunnersuut qiimmatsaatigineqanngitsoq
Qamuteralattartut peqatigiiffiat Qamutit, 98-inik ilaasortaqartoq, kommunimut tusarniaanermut akissuteqartunut ilaavoq. Peqatigiiffiup siunnersuut qiimmatsaatiginngilluinnarpaa.
- Nunatarujussuit taama angitigisut ingerlaffigeqqusaanngitsutut nalunaarsorneqarsimanersut paasisinnaanngilarput. Sooq killilersuisoqassava, peqatigiiffimmi siulittaasoq Mikkel Andreassen Sermitsiaq.AG-mut oqarpoq, itisiliillunilu:
Takuuk: Qamuteralaat pillugit ileqqoreqqusaq
- Sumiiffiup angisussaa tamanut naammappoq, aamma Ukkusissat Quassussuullu tunuani oqquiffinnik arfineq-pingasunik pilersitseqqammerpugut, taakkulu uagutsinnuinnaanngitsoq aamma pisuttunut arpattunullu iluaqutaapput, siulittaasoq nassuiaavoq, taassumalu pisuinnaat arpattullu naapinneqaraangata qamuteralattut mianersorlutik kigaallisartut oqaatigaa. Motoorilinnillu ingerlasut nalinginnaasumik qungujunneqarlutillu ilassineqartarput, Mikkel Andrassen, tusarniaanermut killiliussap sivitsorneqarnera ilisimatitsissutigigatsigut Sermitsiaq.AG-mut nassuiaavoq.