Qamuteralannut malittarisassat nutaat kamaatigineqartut

Kommuneqarfik Sermersuumi innuttaasut qamuteralannik sumi ingerlasinnaanermut malittarisassanut nutaanut nalunaarummut maalaarnissamut kingusinnerpaamik pingasunngorneq periarfissarigaluarpaat.

- Tusarniaanerup sivitsorneqarnissaa aalajangiupparput, taamaalilluni tusarniaanermut akissutinik marsip aallartinnerata tungaanut kommunimut nassiussisoqarsinnaavoq, sanarfinermut avatangiisinullu aqutsisoqarfimmi pisortaq, Hans Henrik Winther Johannsen ilisimatitsivoq.

Soqutigineqarluartoq
Allannguinissamut siunnersuummut soqutiginnilluartoqarnera tunngavilersuutigineqarpoq.

- Sapinngisamik amerlanerpaat oqaaseqarnissaat pingaartuusoq isumaqarpugut. Amerlasuut nalunaarfissaq kingulleq arajutsisimavaat, tassa februaarip arfineq-aappaat, pilersaarusiortoqarfimmi pisortaq nassuiaavoq. Akissutit qanoq amerlatigisut maanna tiguneqareersimanersut taassuma kisitsisaatiginngilaa.

Peqatigiiffik isumaqataanngitsoq
Qamuteralattartut peqatigiiffiata Qamutit 98-nik ilaasortaqartup tusarniaanermut akissutini nassiutereerpaa. Tassanilu malittarisassat nutaat kommunip tusarniaassutigisai isumaqatigineqanngillat.

- Nunatarujussuit taama angitigisut ingerlaffigeqqusaanngitsutut nalunaarsorneqarsimanersut paasisinnaanngilarput. Sooq killilersuisoqassava, peqatigiiffimmi siulittaasoq Mikkel Andreassen Sermitsiaq.AG-mut oqarpoq, itisiliillunilu:

Takuuk: Qamuteralaat pillugit ileqqoreqqusaq

- Sumiiffiup angisussaa tamanut naammappoq, aamma Ukkusissat Quassussuullu tunuani oqquiffinnik arfineq-pingasunik pilersitseqqammerpugut, taakkulu uagutsinnuinnaanngitsoq aamma pisuttunut arpattunullu iluaqutaapput, siulittaasoq nassuiaavoq, taassumalu pisuinnaat arpattullu naapinneqaraangata qamuteralattut mianersorlutik kigaallisartut oqaatigaa. Motoorilinnillu ingerlasut nalinginnaasumik qungujunneqarlutillu ilassineqartarput, Mikkel Andrassen nassuiaavoq.

Kommunalbestyrelsimut kajumissaat
Peqatigiiffik Facebookimi quppernernermini oqallissaarivoq, neriuutigineqarporlu kommunimi politikerit uani suliami isummatik nalunaarutigissagaat, kommunimi innuttaasut nalunaarummut tunngatillugu kikkut qinissanerlugit paasiniassagamikku.

Aamma takuuk: Qamuteralattartut peqatigiiffiata Qamutit Facebookimi quppernerat

Kommunalbestyrelsimi ilaasortat Justus Hansen aamma Nuka Randi Vestergaard Evaldsen peqatigiiffiup Facebookiani oqallinnermut akuliutereerput, taakkualu marluullutik ''killilersuineq uani suliami aqqutissaanngitsoq'' naqissuserpaat.