Partii Inuit qineqqusaartitaat partiimit tunuarpoq

Partii Inuit ilaasortaasa malunniutillit ilaat aamma tunuarpoq. Tassaavoq Markus E. Olsen partiip qullersaanik naammaginnigani matoqqavallaarneraalluni tunuartoq.

Atuaruk: Lars Mathæussen partiimut allamut nuuppoq

Markus E. Olsen tusagassiutinut nalunaarummini allappoq partiit missingersuutai naatorsuutaalu pillugit paasiniaasaraluarnini kinguneqarsimanngitsut. Ilanngullugu oqaatigaa partiip aqutsisuisa ataatsimiinnerannit imaqarnilianik ujartuigaluarlunini kinguneqarsimanngitsut.

Atuaruk: Partii Inuit Maniitsup partii pitsaanerusumik aqunneqaqquaa

Maannalu tassa allamik aqqutissaarussorivoq partiilu pilersitseqataaffini qimallugu.

- Isumaqarpunga partiip siuttua aammalu Naalakkersuisuni ilaasortaatitaq nammineerlutik tunuartinnagit - naalakkersuisooqatigiinnermi ingerlaannarsinnaanerat qularnarluinnartoq, Markus E. Olsen oqarpoq.

Partiikorililikkaminili ilaasortat tamaasa isornartorsiunngilai.

- Partiimimi maannamut qimuttutuaavoq Inatsisartuni ilaasortaq Randi Broberg, taannalu qimukkunnaarpat partii oqaluttuaannanngortussaavoq, Markus E. Olsen oqarpoq.