Siumumi aaqqiagiinnginneq
Partii Inuit naalakkersuisooqatigiit qularilerpaat
Naalakkersuisooqatigiit amerlanerussuteqarnerat aalaqqajuttumut inisseriaannaavoq. Amerlanerussuteqarnerup inissisimalerfigisinnaasaa takuuk Partii Inuit tunulequtaajunnaassappata
Partii Inuit isummerfigisussanngorpaat Naalakkersuisunut inatsisartut tapersersuiinnassanerlutik. Naalakkersuisuni ilaasortat immikkut siunnersorteqarnissaannik kaajallaasitaq aammalu Naalakkersuisuni ilaasortat ilasimanerat pissutigalugit Partii Inuit nalilersoqqinnialerpaat naalakkersuisooqatigiit Inatsisartut tapersersuinnassanerlugit.
Atuaruk: Kristian Jeremiassen: Aleqa salluvoq
Partii Inuit taaseqatigiittarnikkut Siumumik oktoberimi suleqateqalerput Naalakkersuisuniit soraarsitaagamik. Partii Inuilli maanna nalorninartumut inissipput. Maanna naalakkersuisuusut tatigerpiarunnaarpaat, illuatungaatigulli Inuit Ataqatigiit naalakkersuisooqqilernissaat orniginngilaat nukippassuit atorlugit taakku isornartorsioreeramikkit.
Pissutsit arlallit tunngaviupput Partii Inuit naalakkersuisooqatigiinnut Siumumullu tatiginnikkunnaariartornerannut.
- Taaseqatigiittarneq pillugu Demokraatini suleqateqarneq pitsaasuunngilaq, taakkumi tatiginanngitsumik pissusilersorput, Nikku Olsen Sermitsiaq.AG-mut oqarpoq.
Ikerinnakkut qinersineq?
Partii Inuit uranimut naaggaarluinnarnerup atorunnaarneranut akerliullutik taasipput isumaqaramik innuttaasut qulaatiinnarlugit tamanna aalajangiunneqartoq.
- Maanna innuttaasut qulaatiinnarlugit ingerlatsineq malunnarseqqippoq immikkut siunnersortit pillugit kaajallaasitaliortoqarmat inuiaqatigiinnut akisoorujussuusussammik, Nikku Olsen oqarpoq.
Taassuma erseqqissarpaa Partii Inuit siulersuisuunerisa pissutsit maanna killiffiat suli oqaluuserinngimmassuk.
- Inassutigissavara taaseqatigiittarnermik Siumumik suleqateqarnernitta naliliiffigeqqinnissaa. Politikkikkut maanna killiffik akuersaaginnarneqarsinnaajunnaarpoq, Nikku Olsen oqarpoq.
- Ikerinnakkut qinersineq tapersersinnaavisiuk?
- Qinerseqqineq inuiaqatigiinnut akisoorujussuussaaq. Illuatungaatigulli pssutsit taamaatsillugit attanneqarsinnaajunnaariartorput, Nikku Olsen oqarpoq illuatungaani Inuit Ataqatigiit naalakkersuisuulernissaannut akerliusoq.
Amerlanerussuteqarneq imaappoq
- Inuit Ataqatigiit Demokraatillu talerperliuniarpalaartumik ingerlatsinerat qinersineq sioqqullugu takoreerparput isorliunerusuniittut atugarliornerulernerannik kinguneqartoq, pissutsillu tamakku peqataaffigisinnaanngilagut. Maanna pissutsit siulersuisuunerni oqaluuserissavagut ullunilu qaninnerni isummerfigalugit, Nikku Olsen oqarpoq.
Partii Inuit suli mamaagusuutigaat siornatigut ineqarnermut avatangiisinullu naalakkersuisup Miiti Lyngep Partii Inunneersup oqartussaaffii naalakkersuisoqarfinnut marlunnut avinneqarnerat Kim Kielsen Siumumeersoq aamma Atassummeersoq Siverth K. Heilmann naalakkersuisuni ilaasortanngortinneqarmata.
- Tamanna Kim Kielsenimut nipangersaataannaasvoq Siumukkunni eqqissisoqarniassammat. Taamatulli aaqqiineq inuiaqatigiinnut akisoorujussuuvoq akuersaaginnarneqarsinnaanngitsoq, Nikku Olsen oqarpoq.
Naalakkersuisooqatigiit amerlanerussuteqarnerat qajannartorujussuanngussaaq Partii Inuit Inatsisartuni tunulequtaajunnaassappata. Tamanna pissappat naalakkersuisooqatigiit 16-nik tunulequtaqalissapput illuatungiliuttut 15-nik tunulequtaqalissasut. Partii Inuilli tunulequtaaginnassappata naalakkersuisooqatigiit 17-nik tunulequtaqassapput illuatungiliuttut 14-nik tunulequtaqartut.