Siumumi aaqqiagiinnginneq
Kristian Jeremiassen: Aleqa salluvoq
Siumukkut iluanni aaqqiagiinnginneq ingerlaqqippoq Karl Lyberth taarserneqartussanngoraluartoq
Siumut sinnerlugu Inatsisartuni ilaasortap Kristian Jeremiassenip Naalakkersuisut siulittaasuannut Aleqa Hammondimut tatiginninninera annikittuararsuuvoq. Kristian Jeremiassen maanna oqaluttuarpoq Aleqa Hammond ataasinngornermi tusagassiortunik katersortitsinermi sallusoq Karl Lyberthip tunuarnerata nalunaarutigineqarnerani.
Siumup Inatsisartuni gruppeani oqallinneq sakkortooq pisussanngorpoq ilaasortat januarip 27-ani immikkut ittumik Inatsisartut katersorneranni katersuuppata.
Ataasinngornermi tusagassiortunik katersortitsinermi Aleqa Hammond oqarpoq aalisarnermi pitsanngorsaataasinnaasunik Hans Enoksen saqqummiussaqartarsimanngitsoq.
- Tamanna toqqaannartumik salluneruvoq, Kristian Jeremiassen Sermitsiaq.AG-mut oqarpoq illoqarfigisaminit Qasigiannguaniit tusagassiortunik katersortitsineq KNR-TV-kkut toqqaannartumik aallakaatinneqartoq malinnaaffigereerlugu.
Ilungersorneq kinguneqanngitsoq
Kristian Jeremiassenip qanimut ikinngutaa Hans Enoksen tallimanngormat nalunaarpoq Siumumit tunuarluni nutaamillu partiiliornissani isumaliutigalugu. Hans Enoksen isumaqarpoq aalisarneq pillugu apeqqutini tusaaniarneqarsimanani.
- Ilumoorpoq Siumup gruppeata iluani aalisarnermut tunngassuteqartut oqaluuserineranni tusaaniarneqartarsimannginnerput. Hans Enoksen peqatigalugu ukiaanerani katersornerup nalaani qaleralinniarnermi avanersuarmilu aaffanniarnermi iluarseeqqusisarsimagaluarpugut tusaaniarneqarsimanngitsumik. Pissusissamisoortuunngilaq nunap siuttuata eqqunngitsunik saqqummiussaqarnera, Kristian Jeremiassen oqarpoq.
Pisoq tamanna qaqilerniarpaa Inatsisartut immikkut ittumik januarip 27-at katersulerpata.
- Inatsisartuni oqaluttarfimmiit piumasariniarpara Aleqa Hammondip naqqiissuteqarnissaa. Misigisimavunga ilungersorluta piumasaqartarnerigaluagut iluaqutaasarsimanngitsut. Allaanngilaq iikkamut oqaluinnarsimalluta, Kristian Jeremiassen oqarpoq.