Pajuttaat Uummannamut nioqqutissanik tikiussivoq

KNI-p, Royal Arctic Linep aamma Issittumi Sakkutooqarfiup qanimut suleqatigiinnerisigut nioqqutissanik pajuttoq Pajuttaat sapaat 20. december ualikkut nal. Tallimat missaanni Uummannamut tikippoq. KNI taama ilisimatitsivoq.

Sikumik aserorterisoq
Pajuttaat Uummannamut tikissinnaaniassammat, umiarsuaq alapernaarsuut Knud Rasmussen sikumik aserorterivoq, nioqqutissat Aasianni niuneqarsimasut ilarparujussui taamaasillutik Uummannamut apuunneqarsinnaalerput.

Nioqqutissat suli Aasianniittut 200 kbm-terit missaanniittut ullut tulliit ingerlaneranni apuuffissaannut apuuteriarneqarnissaat sulissutigineqarpoq.

Atuaruk: Siku issusooq Avannaani ajornartorsiortitsivoq

Neriorsuisinnaanngitsut
Periarfissaasinnaasut tamaasa atorlugit KNI A/S sulivoq taamaasilluni nioqqutissat Royal Arctic Linep assartuutaanik ingerlanneqartussaasimagaluit tikiffissaannut apuunniarsaralugit. Neriorsuutigisinnaanngilaali nioqqutissat Aasianni uninngasut tamaavimmik tikiffissaminnut apuunnissaat.

- Assorujussuaq nuannaarutigivarput ingerlatseqatigiiffiit arlallit suleqatigaluta suliassamik unamminartumik imaannaanngitsumillu naammassiniaanitsinni peqataammata. Ajuusaarutigalugulu oqaatigereersinnaavarput Kullorsuarmut Uummannallu eqqaaniittunut nunaqarfinnut imaatigut assartuineq maannakkut periarfissaajunnaarmat siku pissutigalugu. Allatut iliorluta taakku tikinnissaat aaqqiissuteqarfiginiarsarivarput. Ataatsimulli isigalugu pisiniarfitsinni tamani pisiarineqarsinnaapput ulluinnarni atugassat nioqqutissat, KNI-mi Nioqqutissanik piniartarnermut nittarsaassinermullu pisortaq Kurt Lauritsen erseqqissaavoq.

Atuaruk: KNI aarlerisaarivoq: Nioqqutissaateqarniarneq ajornartoorfiusinnaavoq