Royal Arctic Line
Siku issusooq Avannaani ajornartorsiortitsivoq
Piffissami kingulliunerusumi issinnerujussua peqqutigalugu imaq sikupallattorujussuuvoq. Tamanna sapaatip akunnerini marlussunni kingullerni imaatigut angalermi kinguaattoortitsivoq Upernaviup Uummannallu imartai eqqarsaatigalugit
Maanna siku ima issutigilerpoq Royal Arctic Linemut avannaani ornitanut apuussinnaaneq ajornarsilluni.
Pajuttaat Kullorsuarmit 40 kilometerisut kujasitsigisumi siku peqqutigalugu uniinnartariaqarsimavoq, ukioq manna assartugassanik kingullernik aalleraluarnermini. Umiarsuup ullut unnuallu marluk sikusioraluarnermut atorsimagaluarpai uniinnartariaqalersimallunili.
Umiarsuaateqarfik Namminersorlutik Oqartussanit pigineqartoq taama ilisimartitsivoq.
Atuaruk: Siku RAL-imut ajornartorsiortitsivoq
Nunaqarfik tikinneqassanngilaq
Aamma ilisimatitsissutigineqarpoq, Pajuttaat maanna Upernavimmiittoq Vestlandiap usingiarneqarnerata naammassineqarnissaa utaqqillugu, kujammut Aasiaat tungaanut sikusioqatigalugu ingerlaqatiginiassagamiuk. Umiarsuit sikumik mattunneqarnissaat ulorianartorsiorfigiumanagu Innaarsuit uniffineqassannginnerarpaat.
- Pajuttaat aamma Vestlandia angalanissap tulliani Uummannaq nunaqarfiilu ingerlaqatigiillutik tikinniarniarpaat, sikussaavitsinnagit, umiarsuaateqarfik allappoq.
Uummannap eqqaani imaq sikujartortorujussuuvoq, taamaattumik pingaartuuvoq Royal Arctic Lineip nittartagaani allannguuteqarsinnaanernik malittarinninnissaaq.
Aamma atuaruk: Sikup raajarniarneq unikaallatsissinaagaa