Paaqqinnittarfiit akikinnerulersinniarlugit aningaasaliisoq

Marlussoriarluni ikilisaanissaq anguniarneqarnikuuvoq maannakkulli qularnarunnaarpoq.

Atuartunut paaqqinnittarfinnik aaqqissuussineq nutaaq, Nuummi AKO meeqqanut 0. klassimiit 3. klassimut atuuttoq marsip aallaqqaataani 2016 atuutsilissaaq.

Tamanna kommunalbestyrelsimit akuerineqarpoq aappaagu missingersuutit akuersissutigineqarnerannut atatillugu.

Kattunneq
AKO tassaavoq Nuummi ingerlanneqarsimasoq atuartunut paaqqinnittarfiit marluk imminnut kattunnerisa taaguutaat. Atuartunut paaqqinnittarfiit akeqanngitsumik orninneqarsinnaasut fritidshjemmillu akiliilluni orninneqarsinnaasut.

Fritidshjemmini paaqqinninnerup pitsaassusia aamma inersimasut amerlassusiat ajorsimanngillat, kisianni angajoqqaat amerlasuut tamanna akiliuteqarfigissallugu ilisimasimanngilaat. Tamassuma kinguneranik inissat 60 procentii pallillugit inuttaqarsimanngillat.

Akeqanngitsoq
Atuartunut paaqqinnittarfiit akiliteqarnani atorneqarsinnaasimapput, kisianni meeqqat quliugaangata inersimasumit ataatsimit paaqqutarineqartarput aamma perorsaanermik siunnerfilimmik ingerlatsisoqarsimanngilaq. Sammisassat inersimasunit aqunneqartut amerlasuut piffissaqarfigineqaratik.

- Uagut naliliinerput imaappoq neqeroorut taanna pitsaasuunngitsoq. Eqqortumik taassagaanni meeqqanik uninngatitsiviuinnarsimavoq. Tamassuma nassataanik perorsaanermik ineriartornerup meeqqallu ataasiakkaat pissarsiaasa akornganni assigiinngissuseq angisoorujussuusoq, Meeqqanut, Ilaqutariinnut Atuarfeqarnermullu Ingerlatsivimmi pisortaq Søren Valbak, tusagassiorfinnut nalunaarummi oqarpoq.

Suleqatigiinneq
- Neqeroorummi nutaami atuarfiup aamma AKO-p akornanni suleqatigiinneq annertusineqassaaq, taamatullu atuarfiup angerlarsimaffiullu akornanni suleqatigiinneq qaffatsinneqarluni, AKO-mi sulisut meeqqat atuarfimmiinneranni aamma atuarfimmiittassammata, pisortap ilanngullugu oqaatigaa.

AKO-mi neqeroorummi nutaami meeqqanut arfineq-pingasunut inersimasoq ataasiussaaq. Meeqqanut sammisassat aaqqissuunneqartassapput aamma ualikkut meeqqat tamulugassaminernik ullut tamaasa sassaallertoqartassaaq.

Saniatigut perorsaanermik aallaavilimmik anguniagassanik pilersitsisoqassaaq ilaatigut tassaallutik oqaatsit, timimik aalatitsineq aamma piorsarsimassuseq.

Akikinnerusoq
Kommunalbestyrelsip kingullermik AKO pillugu suliaqarami suliaq angajoqqaat akiliuteqartarnissaanni unittoorpoq.

Kommunalbestyrelsimi isumaqarpoq akiliuteqartalernissamik aallatitsinissaq angajoqqaat akeqanngitsumik paarsitsisarnerannit nikeriarneq annertuallaartoq, soorlu maannamut Nuummi fritidshjemmeni ingerlanneqartunut assingusumik.

Tamanna missingersuutinik suliaqarnermi politikerit eqqarsaatersuutigaat suliassaqarfimmullu akit appasitsinniarlugit 2,4 millionit koruuninik ilassuteqarlutik.

Kommunalbestyrelsi isumaqatigiissoq
Ilaqutariit SIK naapertorlugu marlunnik aningaasarsiallit marlunnillu meerallit siornatigut siunnersuutaaqqaartumi meeqqat marluk atuareernerup kingorna paaritinniarunikkit 1206 koruuninik akiliuteqartartussaasut maannakkut ilaqutariit taaneqartutut ittut 637 koruuninik akiliuteqartalissapput.

- Akit nutaat kommunalbestyrelsimit isumaqatigiissutigineqarput. Naliliivugut ilaqutariit aningaasartuutinik taamak qaffasitsigisunik tassanngaannaq akiligassinneqassanngitsut. Taamaattumik atuartunut paaqqinnittarfinnik neqeroorutit pitsanngorsarlugillu akikilliliivigivagut, Kommuneqarfik Sermersuumi borgmesteri Asii Chemnitz Narup oqarpoq.

Atuaruk: Nuummi atuartunut paaqqinninnerup aaqqissuuteqqinnera kinguaattoortoq