Ukiuunerani OL
OL-eqataanissamut anguniagalik aalajangiisussamik unammilersoq
Freestyle halfpiperluni sisorartartoq Laila Friis-Salling tallimanngornermi USA-mi World Cupimut peqataassaaq. Taassuma unamminermi angusaata OL-imut peqataasinnaanissaa aalajangiiffigissavaa.
Tallimanngorpat kalaaleq freestyle halfpiperluni sisorartartoq Laila Friis-Salling USA-mi World Cupimi unamminermut peqataassaaq.
Unamminermi angusarissaaruni ukiuunerani OL-imut anngunnissamut periarfissaqarpoq, taanna Korea Kujallermi qaammatip tulliani pisussaavoq.
OL-ertoqarnerani freestyle halfpipernermi peqataasut 24-iusussaapput, Laila Friis-Salling OL-imut peqataanissaminut inissisimaffik ataasiinnarmik amigaateqarluni Sermitsiaq.AG-mut ilisimatitsivoq, maanna normu 25-itut inissisimagami.
World Cupimi unammineq aqagu Mammoth Mountainimi pissaaq.
Taamaalilluni kalaallini OL-imut peqataasussat aapparilissagaluarpaa. Ujakkaartartoq Martin Møller marlunngormat ukiuunerani OL-ertoqarnissaanut peqataasussanngortinneqarluni nalunaarutigineqarpoq, Korea Kujallermi illoqarfimmi Pyeongchangimi tamanna pissaaq.
Aamma atuaruk: Martin Møller OL-imut piareertoq