Hashi
Nunatsinni ilanngaaserisut arfinillit haship eqqunneqarnissaa pinngitsoortissinnaanngilaat
Anngiortumik eqqussiniartut paasineqannginniarlutik aqqutissanik periutsinillu nutaanik nassaarsiortuarput. Ilanngaaserisut nakkutilliinerunerat akisuupilussuussaaq: Ilanngaaserisoq ataaseq qimmeqartoq ukiumut 1 million koruuninik akeqarpoq.
Ilanngaaserisut pingasut, qimmit ikiaroornartumik naamasinnaasut pingasut, qimmiaqqallu marluk ilinniartinneqartut, tassaapput Nuummi hashimik anngiortumik eqqussinissamik pinngitsoortitsinissami nakkutilliinermi upalungaarsimasuutitat.
Naammappallit? Inuit arfiniliinnaat atorlugit mittarfiit Kalaallillu Nunaata sineriaa tamaat 44.000 kilometerinik isorartutigisoq nakkutiginissaanut?
Atuaruk: Hashi pillugu suliami Islandimi politiit suleqatigigaat
Unitsinneqarsinnaanngitsut
Apeqqummut akissutissaq ersarippoq: Naagga!
- Hashi ajornartorsiutaavoq nakkutilliinerinnakkut aaqqissinnaanngisarput. Nunamut eqqussinissamut aqqutissarpassuupput isorartuupilussuarmik sineriaqarluni, taamaattumillu nassuerutigisariaqarlutigu tamatumani inuppassuit pisariaqartut, akileraartarnermut aqutsisoqarfimmi pisortaq Kim Neumann Nielsen oqarpoq.
Taavami suliassap naammassinissaanut inuit amerlanerit pisariaqartippisigik imaluunniit naamik?
- Tunngaviatigut inuit amerlanerujussuit atorsinnaavagut. Tamatigulli nukissavut eqqarsaatigisariaqartarpavut. Pitsaanerusumik nakkutilliisinnaajumalluta assersuutigalugu Danmarkimi suleqatigisavut qanittumik suleqatigisarpavut, tigulaaraluta misissuisarluta nukissaqarnerpullu apeqqutaatillugu sinerissamiittarluta, Kim Neumann Nielsen oqarpoq.
Atuaruk: Ikiaroornartumik anngiortumik eqqusseriaraluartutut pasineqarunnaartoq
Imaatigut eqqussuineq
Ullumikkut ilanngaaserisut mittarfinni ersarissupilussuupput; ingammik Kangerlussuarmi, Nuummi Narsarsuarmilu. Imaatigullu tikittut ilungersunarluinnarput. Maannakkut Islandimi pisoq kilisaammi »Polar Nanormi« hashi 20 kilo arsaarinnissutigineqarluni immaqa tupinnanngitsumik takussutissaavoq imaatigut aqqut silaannakkut aqqummit suli annertunermik atorneqartartoq.
Ilanngaaserisut umiarsuarni misissuisarput. Suliaq taamaattoq ilaannikkut imaannaanngitsumik atugassaqarluni ingerlanneqartarpoq. Assersuutigalugu ineeqqat ilaat silaannaagaasarput ilanngaaserisut sulisinnaassagunik kiinarpaqartariaqarlutik.
- Taamaattumik ilanngaaserisukka putsumut aqqartartutut aamma ilinniarsimapput, Kim Neumann Nielsen nassuiaavoq.
Politiit akerliannik ilanngaaserisut aatsaat tunngavilimmik pasitsaassaqarunik qisuariarsinnaapput. Tamanna pillugu AG-mi atuaruk: