Ammip qalipaataanik immikkoortitsineq
Nunanut allanut unammisartunut sungiusaasoq aapakaatut nittarsaanneqartoq
Nunanut allanut unammisartunut sungiusaasuutigaluni isikkamik arsaattartut peqatigiiffiani B-67-mi Nuumminngaanneersumi sungiusaasoq, Tekle Ghebrelul, GM-imut angunniunnermi ammip qalipaataanik immikkoortitsinermik misigisaqaqqippoq.
Angutit inersimasut isikkamik arsaallutik Nunatsinni pissartanngorniutivinnernut Nuummi anngunniunnerat ippassaq tallimanngornermi naammassineqarpoq.
Aapakaatut isigineqartoq
B-67 Nuumminngaanneersoq aamma Kâgssagssuk Maniitsuminngaanneersup marlunngormat unamminerisa nalaani, unammisartup Maniitsuminngaanneersup, Tekle Ghebrelul assilisimavaa, aapakaanillu banaaninillu emoji-lerlugu Snapchat-imut saqqummersissimallugu.
- Taanna kammalaatinnik kammalaateqarpoq, allallu mamiatsaatigisimavaat uannullu ingerlateqqillugu, B-67-ip sungiusaasua oqaluttuarpoq.
- Taama pineqarnera qatsuppara, maajunnarpoq mamiatsannarlunilu. Massakkut assut nuanniitsumik misigisimavunga. Misigissuseq inunnit allanit takorloorneqarsinnaanngitsoq, Tekle Ghebrelul, aliasuppasilluni oqarpoq.
Siullermiinngitsoq
Tekle Ghebrelul siullermeerluni timersornerup iluani ammip qalipaataa aallaavigalugu immikkoortitsinermik aatsaat misigisaqanngilaq. 2012-mi Aasianni GM-ertoqarnerani ammip qalipaataanik immikkoortitsiffiusumik arsaannermik ingerlataqarusunnginnami, arsaanneq ikerinnakkut unitsittariaqarsimavaa.
Kingullermilli Manittsumi futsalimik GM-ertoqarnerani aamma ammip qalipaataa aallaavigalugu immikkoortitaasimavoq, tassani isiginnaariat ilaasa taanna Nunatsinniittariaqanngikkaluartoq suaartarfigitissimalluni.
Pisoq isikkamik arsaannermik sungiusaasup oqaluttuarissallugu ajuusaarnaa, taamaattoq isumaqarpoq pisut taama ittut akiorneqartariartut.
- Ikiorneqarlunga kisimiillungaluunniit ammip qalipaataa aallaavigalugu immikkoortitsisarneq ilungersorlunga akiorniarsarissavara. Kisimiissangumalu uanga nammineq suleriaasera aalaavigalugu sulissutigissavara, taanna oqarpoq.
Assit nalunaarutigineqartut
- Isumaqarunillu taama iliornikkut isikkamik arsaannermik sungiusaasuujunnaassasunga, taakku kukkorujussuarput. Isikkamik arsaanneq nuannareqaara, timersoqatigiiffillu apeqqutaatinnagu sungiusaasutut ingerlaannassaanga, Tekle Ghebrelul naqissusiivoq.
B-67-p sungiusaasuata Kâgssassummut unamminermit assit ammip qalipaataa aallaavigalugu immikkoortitsineq Kalaallit Nunaani Isikkamik Arsaattartut Kattuffianut nalunaarutigisimavaa. Taassuma neriuutigaa siulersuisut tulluartumik pisumut aalajangiiumaartut, Timersortartulli Kattuffia peqatigalugu iliuuseqarfigineqassasoq.
- Isumaqarpunga ammip qalipaataa aallaavigalugu immikkoortitsisarneq takussaasoq paasitinneqartariaqartoq. Nassuerutigisariaqarpoq iliuuseqarfigaluguli. Timersoqatigiiffiit siulersuisuisa sammisariaqarpaat, timersortartulli kattuffiata kattuffiit katersorlugit oqaloqatigalugu qanoq iliuuseqarnissaq oqaloqatigiissutigineqassalluni.
Sunde værdier skal opbygges
- Timersortartut Kattuffiata uangalu kattuffigisara isikkamik arsaanneq pineqarmat siuttuusariaqarput. Toqqorterniarsarineqassanngilaq. Naleqartitammi pitsaasut eqqartorneqarput, Tekle Ghebrelul oqarpoq.
Inuk ammip qalipaataa aallaavigalugu immikkoortitsisoq Snapchat-imut saqqummiussisimasoq pineqanngitsoq, taanna erseqqissaavoq. Ajornartorsiutilli iliuuseqarfigineqarnissaa kisiat kissaatigaa.