Ammip qalipaataanik immikkoortitsineq
Nunanut allanut sungiusaasoq ammip qalipaataanik immikkoortitsilluni suaartartoqarnera tupaallaatigaa
Maniitsumi futsalimik GM-ertoqarnerani nunanut allanut sungiusaasoq ammip qalipaataanik immikkoortitsilluni suaartarneqarpoq.
Semfinalertoqarnerani killiffiit qaangerneqarsimasut, KNR allaaserinnippoq.
Kamaammerujussuarlunilu aliatsattoq
- Nunatsinni suit? Nunatsinni susassaqanngilluinnarputit. Kalaallit Nunaanniissanngilatit, Kalaallit Nunaanni atorfissaqanngilatit, KNR malillugu Tekle Ghebrelul taama suaartarfigineqarsimavoq.
Sungiusaasoq Eritreameersuuvoq. Nunatsinnilu ukiuni 14-ini najugaqarsimalluni. Taanna kamaammerujussuarlunilu aliatsaqqalluni, Teklep paasissutissiaraa
Isiginnaartut sukannersumik oqaluunneqartut
GBU-p siulittaasua John Thorsen akuliuppoq isiginnaariallu mikrofonikkut oqaaseqarfigai isikkamik arsaattunik isiginnaarnermi qanoq pissusilersortoqartarnissaa erseqqissaatigalugu. KNR malillugu nalunaarutigineqartut isiginnaartunit paasineqarsimavoq.