Klasse tamarmi angusinngitsoorpoq
Meeqqat atuarfianni ajornartorsiutit ilinniartitaanermut tuniluupput. Assersuutit ilagaat Nuummi saviminilerinermi ilinniarfimmi klasse ilivitsoq innaallagisserinermut angusinngitsoormat. – Arlaannik iliuuseqartoqartariaqarpoq, installatørit oqarput
Meeqqat atuarfianni ilinniartitsisut atuartut angusaat naammaginngilaat. Ajornartorsiut ilinniartoqarfinnut ingerlaqqittarpoq tassanilu inuusuttut ajorsarneq misigisarpaat.
Atuaruk: Meerarpassuit siunissaat ajorpoq
Nuummi innaallagisserinermi installatørit pissutsit taamaannerat naammagiinnarsinnaajunnaarpaat. Taakku assersuut ajorluinnartoq qaqilerpaat atuartitaanerup pitsaannginnerata kingunerisa ilaat.
- Saviminilerinermik Ilinniarfimmi H1-mi atuartut klassi tamarmi innaallagisserinermi decemberimi angusinngitsoorpoq. Tamanna ajorluinnartumik assersuutissaavoq ilinniartitaanermi ajornartorsiuterpassuarnut, Torben Nielsen Arssarnerniit Nuummi installatørit sinnerlugit tusagassiutinut nalunaarummini allappoq.
Akissarsiakitsut
Pissutsit ajorsiartornerat maanna takussutissaqarnerulerpoq. Innaallagialerisutut ilinniartut 25-it missaanniittuartuupput. Ukiut tallimat matuma siorna tamakkipajaarlutik angusillutik ilinniakkaminnik naammassisarput. Maanna affaannaat naammassisarput.
Ilinniarnerup pitsaannginnera meeqqat atuarfiata kisimi akisussaaffiginngilaa. Saviminilerinermik ilinniarfik aamma akisussaaffeqarpoq, installatørilli isumaqarput ilinniartitsisut piukkunnarluartut amigaataasut.
- Saviminilerinermik Ilinniarfimmi ilinniartitsisut akissarsiaat meeqqat atuarfianni ilinniartitsisumit appasinnerupput aammalu installatørit akissarsiaanniit appasinnerungaatsiarlutik. Tassuuna takuneq ajornanngilaq ilinniartitsisunik piukkunnartunik pissarsiniarneq qanoq ajornakusoortigisoq. Taamaammat ilinniartitaanerit ingerlalluanngillat tamannalu suliffeqarfiit akuersaarsinnaanngilaat, Torben Nielsen oqarpoq.
Installatørit isumaliutigigaluarpaat ilinniartut Danmarkimut ilinniariartortittalernissaat kisianni qallunaatut piginnaasakittut eqqugaanissaat aarleqqutigaat. Maanna Savimilerinermik Ilinniarfiup oqallisseqatiginnissaa kaammattuutigaat.