Ilinniartitsisut: Meerarpassuit siunissaat ajorpoq
Ilinniartitsisut suliffitsik isornartorsiorpaat. Misilitsinnerni soraarumeernernilu angusat ajorpallaarnerat pissutaalluni meerarpassuit siunissaat ajorluinnarpoq
Meeqqat atuarfianniit soraarummeertut affaat tikillugit ilinniakkamik aallartitsineq ajorput soraarummeernermi angusaluppallaarneq ilaatigut pissutigalugu. Ilinniartitsisut peqatigiiffiat IMAK isumaqarpoq meeqqat atuarfiat misissoqqissaarneqartariaqalersoq.
- Atuartut immikkut pisariaqartitsisut ikiornissaannut meeqqat atuarfiat sanngiippallaarpoq. Meeqqat ilaat ADHD-rput imaluunnit angerlarsimaffimmi pitsaanngitsunik atugaqarneq pissutigalugu eqqissiviittarlutik. Taamatut eqqissiviinneq atuartut allat aamma kinguariaatigisarpaat. Taamaammat meeqqat immikkut pisariaqartitsisut ikiornissaannut pikkorinerulertariaqarpugut, IMAK-imi siulittaasoq Sivso Dorph Sermitsiaq.AG-mut oqarpoq.
Atuaruk: Sivso IMAK-imi siulittaasutut qinigaaqqittoq
Ilinniartitsisut ilinniarluarnerusariaqarput
IMAK isumaqarpoq ilinniartitsisut ilinniarteqqittarnerisigut immikkut pisariaqartitsisunik ikiuiniarneq pitsanngoriartinneqarsinnaasoq.
- Atuartut ilaqarput naqinnernik ilisarinnissinnaanngitsunik taamatullu ajornartorsiutilinnik ilinniartitsisinissamut immikkut ilinniarsimasunik peqanngilagut. Aamma taamaappoq ADHD-mik aamma autismemik nappaateqartut eqqarsaatigalugit. Tassa meeqqat sanngiinnerusut ikiornissaat pikkorluffigivallaarparput, Sivso Dorph oqarpoq.
- Meqqqat inuusuttullu amerlaqisut siunissaat massakkut sequtserneqarput, Sivso Dorph oqarpoq.
Kommuneqarfiit kattuffiat Kanukoka Ilulissani ulluni makkunani ataatsimiippoq tassanissaarlu IMAK ataatsimeersuarpoq.
Kanukoka aamma IMAK suleqatigiillutik Naalakkersuisunut kaammattuuteqarniarput meeqqat atuarfiata misissuiffigineqarnissaanik.