Aviisi: - Aleqa, puigugaqarputit
Danmarkimit avissaarnikkut allanik isumalluuteqalernissaq Aleqa Hammondip oqaluttuarisariaqarpaa. Taama Berlingske pingaarnerutitatut allaaserisamini allappoq
- Naalagaaffeqatigiinneq ataatsimoortumik tapiissutinut tunngassuteqaannanngilaq. Aamma ataatsimooqatigiinnerup peqatigiilluni ineriartornermut atornissaanut tunngassuteqarpoq. Kisianni ataatsimooqatigiiffimmut ilaasut arlaat sunniutilerujussuarmik nalunaaruteqartuaannarpat ataatsimooqatigiiffik piaarnerpaamik qimakkusunneqartoq, tamanna siulittuutinngorsinnaavoq isumamineersumik eqquuttoq.
Siumup siulittaasua Aleqa Hammond sisamanngornermi unnukkut TV-Aviisimi Kalaallit Nunaata namminerisaminik tunngaviusunik inatsiseqarluni namminiilivinnissaanik anguniagaqarnerminik nalunaarutiginnereersorlu Berlingske pingaarnerutitatut allaaserisamini arfininngornermi taama allappoq.
- Kalaallit aqutsisut Aleqa Hammonditut ittut qinersisartunut oqaluttuarisariaqarpaat, Danmarkimit avissaarneq allanik immaqa Kalaallit Nunaannut tusaaniarpallaarusunngitsunik isumalluuteqalernermik nassataqartussaasoq. Qinersisartut partiinik eqqortunik taasiinnarpata namminiilivinnissap uaneralaannguamiinneranik kalaallit aqutsisut qinersisartutik oqaluffigippatigik, qinersinerup kingorna pakatsineq angisoorujussuussaaq, Berlingske allappoq.
Læs også: Ligeså snart de bliver rige - skrider de
Læs også: Aleqa vil ud af rigsfællesskabet
- Kalaallit Nunaat suliassat inuiaqatigiit ingerlatinnissaannut pisariaqartut isumaginissaannut siunissami qanittumi aningaasassaqanngilaq ilinniarsimasunillu sulisussaqarani tamakkuninngalu pissarsilertornaviarnani. Eqqartuussiveqarnermi, peqqinnissaqarnermi, ilinniagaqarnermi, annaassiniartartoqarnermi, allaffissornermi, inuussutissarsiornermi nunallu namminersortuuneranik isumaginninnissami Kalaallit Nunaat allanik isumalluuteqarpoq. Danmarkiunngippat immaqa USA-mik Canadamilluunniit.
Naalagaaffeqatigiinnerup ukiumoortumik oqallisigineqartarnissaa Folketingimi amerlanerussuteqarluartut, aamma kalaallit ilaasortat, isumaqatigiissutigaat. Inuussutissarsiutinik ineriartortitsinissamik annertusisamik suleqatigiittoqartussanngorpoq. Tamanna Naalagaaffeqatigiinnerup ilaata Danmarkip Kalaallit Nunaannut ataqqinninneranut ersiutaavoq. Kalaallit eqqaamasariaqarpaat, ataqqinninneq iluaqutaasumik ataqqeqatigiinnerusinnaasoq.
Du kan læse hele lederen her