Partii nutaaq avissaarnissamut piareersimavoq
Partii Inuit tallimanngormat siullermeersumik Nuummi tusagassiortunik katersortitsivoq. Partii Danmarkimit avissaarnissamu piareersimavoq
- Kalaallit innuttaasut ullumi Danmarkimit avissaarnissarput piumasarippassuk piareersimavugut.
Taamatut oqarpoq Partii Inuit siulittaasua Nikku Olsen, tikkuarluguli partii Danmarkimik suleqateqarnissaminut piareersimasoq.
- Innuttaasutut ullumikkuminngarnit nukittunerulissaagut. Kalaallit Nunaat pissutigalugu qunussanngilagut, suut tamarmik isumatusaarluni ingerlanneqassapput, Nikku Olsen oqarpoq.
Partii Inuit, januaarip 24-anni pilersinneqartup, anguniagaraa killiligaanani oqaaseqarsinnaanerup siuarsarnissaa. Partii isumaqarpoq sinerissamit malaarutit tusaaniarneqarneq ajortut.
- Partiitut isumaqarpugut Kalaallit Nunaanni killiligaanani oqaaseqarsinnaaneq annikillisimasoq. Sinerissamit isummanik tusanngisaannangajappugut. Aamma isumaqarpugut qulaanit aqunneqarpallaartugut. Anguniagaraarput innuttaasut oqaluttuutissallugit Kalaallit Nunaanni qanoq isilluta aqunneqarnersugut, Nikku Olsen oqarpoq.
Atuaruk "Partii Inuit: Kimilluunniit mattussinngilagut"
Atuaruk "Partii Inuit Inatsisartunut piareersimavoq"
Atuaruk "Partii nutaaq pilersinneqarpoq"
Inuttut naleqartitat
Kalaallit Nunaat Danmarkimit avissaassappat partiimut pingaaruteqarpoq inuttut naleqartitat attatiinnarneqarnissaat ineriartorteqqinnissaallu.
- Innuttaasutut namminiilernissatsinnut piareersassaagut. Issiaannarluta qanoq pissanerluta utaqqiinnassanngilarput, ineriartornerlu nunami tamarmi ingerlanneqassaaq. Nuummiinnaanngitsoq, Nikku Olsen erseqqissaavoq tallimanngormat ualikkut Nuummi inuusuttut klubbianni ´Alleq´-mi tusagassiortunik katersortitsilluni.
Partii qineqqusaarnissamut qilanaarpoq.
- Qineqqusaarnerup inernissaanut kissaatigisaqanngilagut. Isumassarsiatta piviusunngortinnissaat qilanaariinnarparput, Nikku Olsen isumalluartoq oqarpoq, taannalu siusinnerusukkut Inuit Ataqatigiinnut ilaasortaasimavoq.