Bell 212-inik ajornartorsiuteqartoq Air Greenlandip nassuerutigaa

Sermitsiaq.AG-p allaaserisimavaa Kujataani timmisartumik angallassineq ajornerulersimasoq, helikopterip Bell 212-ip helikopterimut S-61-imut taarsiullugu atorneqalernerata kingorna. Ukiortaamiit Bell 212-it marluk Qaqortumiit Qaqortumullu ilaasinik angallassisimapput.

Aaqqissuussineq nutaaq maanna ullut marluk sinnerlugit atuussimavoq, mannalu tikillugu taamaatitsiinnarnernik kinguaattoornernillu kinguneqarsimavoq, amerlasuunut pakatsissutaaqisumik.

- Ukiup nutaap pitsaanerusumik aallartinnissaa kissaatiginartikkaluarparput. Helikopterit aappaani uuliamik naqitsissummi teknikkikkut ajornartorsiuteqarsimavoq, tamannalu nunap immikkoortuata iluani timmisartuussinermi kinguaattoornernik taamaatitsinernillu kinguneqarsimavoq. Tamanna pissutigalugu sisamanngormat timmisartuussivinnut aalajangersimasunut 17-inut timmisartuussinissat nunaqarfinnullu timmisartuussinissat qulingiluat taamaatiinnarneqarsimapput, Air Greenlandip ingerlatsinermut pisortaa Niels C. Frederiksen nassuiaavoq.

Atuaruk "Helikopterinik pakatsineq: Kikkut tamarmik assatik asappaat"

Atuaruk "Kujataani angallannermi atukkat sussaanngitsut"

Ilaasut 60-it sinneqartut eqqorneqarput
Taamaatitsiinnarnerit kingunerisaannik ilaasut 30-t missaanniittut Narsarsuarmit Nuummut ilaaffissaminnut angumersinngitsoorput, Kangerlussuarmiillu Narsarsuarmut ilaasut 35-it missaanniittut Kujataani sumunngarfimminnut sisamanngormat apuutinngitsoorput.

Air Greenlandip sapinngisani tamaat ajornartorsiutit ikiorserniarpai ullumilu tallimanngornermi atortunik Narsarsuarmut nassiussisimalluni, teknikkikkut ajornartorsiutinut atortussanik, helikopterit marluk ualeq taanna tamakkiisumik angalaqqilersinniarlugit. Tamatuma saniatigut aqagu arfininngornermi Dash-7-imik immikkut timmisartuussinikkut ilaasut tamarmik apuuffissaannut sapaatiuppat apuunniarneqassapput.

Ajornartorsiutit pinngitsoorneqarsinnaapput
- Ajoraluartumik aallartisarnermi ajornartorsiutit pinngitsoorneqarsinnaagunanngillat timmisartut allat atulernerisigut, tamatumuunalu aamma taamaassimavoq. Isertuussimanngilarput silamut isumannaatsuunissamut Bell 212-imut pissutsit allat S-61-iminngarnit atuuttut, ullunili siullerni aamma allanik akornuteqartarsimavugut. Ingerlatsinermut immikkoortoqarfitsinni Kujataanilu stationeqarfitrsinni ilaasunut akornutit annikillisarniarlugit sulivugut, oqaatigineqareersutullu neriuppugut aqagu ualikkumiit tamakkiisumik ingerlatseqqilissalluta, Niels C. Frederiksen Sermitsiaq.AG-mut oqarpoq.

S-61 akisuvallaaqaaq
PIssutsit ingerlanerlunnerannut kina pisuunesoq Air Greenlandip oqaaseqarfigiumanngilaa. Timmisartortiseqatigiiffik nassuiaavoq sullissinermut isumaqatigiissutit aningaasartaat 2005-imiilli iluarsineqarsimanngitsut, tamannalu pissutigalugu Air Greenlandip aningaasaqarnera siusinnerusumit ullumikkut nalikinneruvoq. Allatut oqaatigalugu aningaasat taakkorpiaat maanna sullissinissamik isumaqatigiissutinut atorneqartut ukiuni kingullerni arfineq-marlunni taakkuusimapput.

Taamaasilluni - timmisartortitseqatigiiffik naapertorlugu - siusinnerusutut pitsaassusilimmik sullissisoqarsinnaanngilaq. Isumaqatigiissutip aningaasartaanut sanilliullugu S-61-it atussallugit akisuvallaalersimapput, tapiissutillu kisimik pisuunngillat aammattaarli helikopterit tamakkua atorunnaariartorneqarnerat.

- Bell 212-it atorlugit angallassinissat atamaasa ajornartorsiuteqanngitsumik ingerlassinnaavagut, isertuutinngisaannarsimavarpulli S-61-ip Bell 212-illu atornerat assigiinngissuteqartoq, tamannalu ammaffigisimavarput 2013-2014-imut isumaqatigiinniuteqarnernut atatillugu. Aamma eqqaamasariaqarpoq Bell 212-imik atuilernermi arlalinnik iluaqutissartaqarmat, soorlu aallarnerit amerlanerusut angalanerillu sivikinnerusut, Air Greenland oqarpoq.