Juullimut akissarsiat sorsuutigineqarnerat uninngilaq
Aappaagu juullertinnagu akissarsiat tunniunneqarnissaat SIK-p sorsuutigeqqissavaa, siulittaasoq Jess G. Berthelsen oqarpoq, Naalakkersuisullu saassuppai inunnik akeqqersimaarniartutut
Sulinermik inuussutissarsiuteqartut kattuffiata SIK-p siulittaasuata Jess G. Berthelsenip ukiortaami oqaaseqaammini juullimi akissarsiat tunniunneqannginnerat pillugu Naalakkersuisut saassuppai.
Tassami Jess G. Berthelsen isumaqaannanngilaq akissarsiat juulli sioqqullugu tunniunneqartarunnaarnerannik Naalakkersuisut tunngavilersuutaat inunnik akeqqersimaarniartuinnaanngitoq, aamma isumaqarpoq Naalakkersuisut innuttaasut meeqqatut isigigaat, ilimanninngitsut namminerminnut suna pitsaanerpaanersoq, aammalu pigissaarnerit samminerugaat ´inukulunnguaninngarnit´, SIK-p siulittaasua malilugu naliuttorsiornerinnarni Naalakkersuisunit eqqaaneqartartunit.
Atuaruk "Juullimi akissarsiat: SIK-p namminersorlutik oqartussat naveerpai"
Atuaruk "Taasinerup inernera namminersorlutik oqartussat ajuusaarutigaat"
Jess G. Berthelsen oqarpoq juulliaqqap aqagua allaat angullugu isumaqarsimalluni neriussimallunilu Naalakkersuisut naakkinnilissasut akissarsiallu juullertinnagu tunniullugit, soorlu siorna taamatut pisoqartoq.
Taamatullu pisoqarsimannginnera Jess G. Berthelsenip maanna ajuusaarutigaa:
-Siullersaallunga ajuusaarutigissavara SIK-p siulittaasuatut akissarsiat juullertinnagu tamakkununnga (SIK-mi ilaasortanut, aaqqiss.) tunniunneqarnissaat tamatumuunga iluatsinngitsoorakku, taanna oqarpoq namminerlu misigisani tunngavilersuutigalugu akissarsiat juullertinnagu tunniunneqarneranni iluaqutissat ajoqutissanit amerlanerusut::
Atuaruk "AK: Naalakkersuisut eqqortinnerat sakkortooq"
- Nammineq meeraaninnit eqqaamavara angajoqqaakka sulisartuusut. Ulluinnarni sunik tamanik piumasinnaaneq ajorpugut. Nuannernerpaatulli eqqaamasarpara meeraalluta ukiut tamaasa juullimi tunissutisisarnerput, qaammammut tulliuttunut januaarimut naammattorsuarmik qaangiisunik, qaammat taanna ilaanneeriarluta pisarnermit nerinikinnerusaraluarluta, SIK-p siulittaasua oqarpoq, taassumalu akissarsiat juulli sioqqullugu tunniunneqartarnissaannik sorsuutiginninnini taamaatinngilaa.
- Uanga nammineq inuttut isumaqarpunga qinersisartut qatsulluinnaraat meeqqanut pineqartarnertik, anaanatsinnit oqarfigineqartuartut namminerminnut suna pitsaanerpaanersoq. Tamanna akissutissarsissavarput aappaagu Inatsisartunut qinersilerutta.
Jess G. Berthelsenip ukiortaami oqaaseqaataa tamaat atuarsinnaavat ataani.