Nunaqqatitta atorfimminni qaffannerat ilinniarfigisinnaavarput
Jens B. Frederiksen isumaqarpoq ukiut 50-t matuma siornatigut kalaallit siulliit Kangerlussuarmi mittarfimmi atorfimminni sukkasuumik qaffannerat isumassarsinartuusoq
- Isumaqarpunga eqqarsarnartuusoq ukiut 50-it matuma siornatigulli nassuerutigineqarsimammat sulisartut nunaqavissut atorneqarnissaannut ilinniagaqartitsineq ilinniartitsinerlu aqqutissat pitsaanersarigaat. Tamassumami pikkoriffigilernissaaq ulloq manna tikillugu sulissutigaarput.
Taamatut oqarpoq ineqarnermut, attaveqarnermut angallannermullu Naalakkersuisoq Jens B. Frederiksen, Demokraatit, kalaallit siulliit Kangerlussuarmi sulilersut ukioq manna ukiut 50-inngortorsiorneranut atatillugu.
Ukiunik 50-inngortorsiorneq qaammatip naalernerani Kangerlussuarmi Sisimiunilu malunnartinneqassaaq, kransiliinikkut kaffillernikkullu, ilaatigut taamanikkut sulisuusimasut pingasut, Johan Ole Absalonsen, Jens Kleist aamma Elias Kajussen peqataaffigisaannik.
- Taamanikkunnit misilittakkat tusarfiginissaat qilanaaraara, neriuppungalu tamanna eqqarsalersitsisinnaasoq qanoq isilluni atorfimmi saqqumilaarlunilu qaffariartortoqarsinnaasoq, nunat tamalaat suliffianni kalaallit ikittuinnaat ilagigaanni, Jens B. Frederiksen oqarpoq.
Annertunerusumik atuarit uani "Kangerlussuarmi ukiuni 50-ini nunaqavissunik sulisoqarneq"