Marlunnik toqusoqarnera pillugu oqaaseqarusunnginneq
Aasianni arfininngornermi ullaakkut marlunnik toqusoqarnerata kingorna politiit oqaaseqartinnissaat ajornarpoq. Marlunnik toqusoqarnera suliatut ataatsitut ingerlanneqartoq politiinit arfininngormat ilisimatitsissutigineqarpoq
Inunnik marlunnik Aasianni arfininngornermi ullaakkut marlunnik toqusoqarneranut attuumassuserneqartunik tigusarinninneq avammut paasissutissanik nutaanik kinguneqanngilaq.
Nuummi Politiini pigaartuusoq sapaammi Sermitsiaq.AG-mut ilisimatitsivoq, suliaq Aasianni ingerlanneqarmat suliamut atatillugu qanoq ingerlariaqqittoqarnissaanut tunngasumik oqaaseqarsinnaanani oqaaseqaqqusaananilu, Aasiannilu politiinut sianertaraluarneq akineqartanngilaq.
Læs "To mænd er døde - to er anholdt"
Vicepolitimester Pavia Kleist arfininngormat Sermitsiaq.AG-mut ilisimatitsivoq inuit marluk Aasianni tigusarineqartut. Taakkua arfininngornermi ullaakkut siullermik imminut toquttoqarneranut sivitsunngitsorlu paggittoqarneranut politiit takkunnerisa kinguninnguatigut angutip toqoreersimasutut nalunaarutigineqarfigisaanut attuumassuserneqarput.
Paasissutissat siulliit kisiartaagallartullu malillugu marlunnik toqusoqarnera suliatut ataatsitut politiinit isigineqarpoq.
Tigummigallarneqartut inatsisit malillugit akunnerit 24-t iluanni inatsisit tunngaviusut malillugit killisiuinermi eqqartuussisumut sassartinneqassapput, tamannalu matoqqasumik pissasoq Pavia Kleistip arfininngornermi ullaakkut ilimagaa.
Sermitsiaq.AG-p paaserusussimagaluarpaa imminut toquttoqarneratut isikkoqartumi pinerluttoqarsimanersoq. Tamatuma saniatigut toqusut marluk qanoq ilillutik suliatut ataatsitut ataqatigiissinneqarsinnaanersut, kiisalu tigummigallagassanngortitaasut suli tigummigallagaanersut sulilu pasisaanersut, tigummigallagassanngortitsinerlu qanoq sivisutigisumik aalajangiusimaneqaneqassanersoq.
Suliaq aaqqissuisoqarfimmit malinnaavigineqarpoq