AK: Kikkut tamarmik isumaqatigiinniarnerit ataqqissavaat

- Malugisimavara Kanukokap inatsisitigut akulerunnissamik, Imak-mik aaqqiagiinngissuteqarnermik qaangiisitsisinnaasumik, kajumissaarutaa politikkikkut tapersersorneqarluartoq. Tamanna maanna naalakkersuisunik oqaloqatigiissutigissavara, aalajangernerlu piaarnerpaamik tamanut nalunaarutigineqassaaq.

Taamatut arfininngormat oqarpoq aningaasaqarnermut naalakkersuisoq Maliina Abelsen.

Atuaruk "Ilinniartitsisunik aaqqiagiinngissuteqarneq inatsisitigut akuleruffiginiaraat"

Maanna Atorfillit Kattuffiat saqqummiussivoq:

- Atorfillit Kattuffiata tunngaviusumik kommunit sisamaasut oqariartuutaat isumaqatigilluinnarpaa, tassa meeqqat atuarfiata ingerlanissaa inuiaqatigiit susassaqarfigigaat pingaaruteqarluinnartoq, Atorfillit Kattuffianni siulittaasoq Erik Hammeken oqarpoq, tassanilu kattuffeqarput tjenestemandit, tjenestemandinut assingusumik atugassaqartinneqarlutik sulisut, isumaqatigiissutit malillugit sulisut kiisalu sulisut Kalaallit Nunaanni namminneq isumaqatigiissutillit.

- Taamatut oqariarluni aamma pingaaruteqarpoq tulliuttoq oqaatigissallugu, pingaartumik partiit politikkikkut oqaaseqartartuinut tunngatillugu: Inatsisiliuussineq illua'tungeriit isumaqatigiinniarnerisa ajalusooqqasut aaqqiissutissaattut aqqutissaanngilaq.

- Maanimi isumaqatigiinniarnermi periusissaq aalajangersimasoq, qallunaat nuaanni periusiusartup assinga tamatta malitassaraarput. Tassani sulisut akissarsiaat sulinermilu atugassarititat allat illua'tungeriinnit isumaqatigiinniutigineqartussaapput. Pisumi matumani IMAK_ip Namminersorlutillu Oqartussat isumaqatigiinniaratrfiata akornanni isumaqatigiinniarnerit pineqarput, Erik Hammeken oqarpoq.

- Borgmesterit, minnerunngitsumillu politikkikkut partiit isumaqatigiinniarnernut akuleruttussaanngillat. Taarsiullugu sulisut kattuffiisa kiffaanngissuseqarlutik isumaaqataigiinniarsinnaatitaaneri taakkua ataqqisussaavaat.

Atuaruk "Naalakkersuisut ukiuni pingasuni kinguarsaasimapput"

Atuaruk "Imak: Alianaqisoq akuersaarneqarsinnaanngilluinnartorlu"

Kanukoka sapaatip akunnerani kingullermi nalunaaruteqarpoq kommunit sisamat ataatsimoorlutik naalakkersuisunut saaffiginnissutimikkut ernumanartoqartittorujussuugaat ilinniartitsisut kattuffiannik Imak-mik isumaqatigiinniarnerit ajalusoorsimanerat, taamaattumillu naalakkersuisut kajumissaarneqartut inuiaqatigiinni politikkimi atituumik tapersersorneqartumik allatigut iliuuseqarnissaq isumaliutigeqqullugu, tamatumuuna meeqqat atuarfiata toqqissisimasumik aalajaatsumillu ingerlanissaa qulakkeerniarlugu.

Kingorna partiit politikkikkut oqaaseqartartui arlallit oqarput politikkikkut akulerunnissaq pisariaqarsinnaasoq naggataatigut inatsisiliorluni.