Nick Nielsen IA-mut qaninniarpoq

Siumumeersoq Nick Nielsen partiiminit anilerpoq misigisimajunnaarami politikkikkut partiini tunuliaqutarisinnaallugu.

- Tunuliaqutaqartutut misigisimanngilanga. Aamma tukattorujussuarmik sivisuumik ingerlasimanerput qasunarseqqavoq. Suli tunuarniutiga tunniunnikuunngilanga, kisianni Siumumi imminut ilisarisinnaajunnaartutut misigisimavunga. Tunuarniuteqarnissara ullut tullii sulissutigissuara.

Taama Nick Nielsen Sermitsiaq.AG-mut oqaluttuarpoq. Nick Nielsenip ilanngullugu aamma oqaluttuaraa partiimut Inuit Ataqatigiinnut sapaatip akunnera kingulleq naajartulersoq attaveqarsimalluni paasiniarlugu qanoq ililluni Inuit Ataqatigiinni ilaasortanngorsinnaanini.

- Suna tamaat qittullugu Siumumi angerlarsimaannarnissara sulissutigigaluarpara, kisianni misigisimanngilanga tunuliaqutaqarlungalu tapersersorneqarlunga, Nick Nielsen Sermitsiaq.AG-mut oqaluttuarpoq.

Atuaruk: Grafikki: Nuummi umiarsualivilik ima isikkoqassaaq

Siumup muminnera akerleraa
Nick Nielsenip sooq Siumumi imminut ilisarisinnaajunnaarnerminut Nuummi talittarfissap suliffeqarfimmit ataatsimit suliarineqarnissaanut aalajangerneq assersuutitut atorpaa.

Naalakkersuisummi februaarip aappaani aalajangernerat naapertorlugu Nuummi talittarfissamut, katillugu 402 millioner koruuninik naleqartumut, suliffeqarfissuaq ataaseq suliaqartussaq toqqarneqarpoq.

Siumup ataatsimeersuarnerani aalajangerneqarpoq fagentreprise toqqammavigalugu (suliffeqarfiit arlallit ataatsikkut suliami ataatsimi suliaqartinnerisigut, aaqq.) sanaartortitsisoqartassasoq suliffeqarfiit Nunatsinniittut illersorumallugit. Tassa taanna Siumup siunertaralugulu qineqqusaarutigisaa, Nick Nielsen nassuiaavoq. Taassuma aamma Nuummi talittarfissamik suliaqartussaat, suliffeqarfittut nunatsinni angerlarsimaffeqanngitsutut assersuunneqarsinnaasut, soorlu Exelis Servicesimut, Per Aarsleff Grønland ApS Nunatsinni siusinnerusukkut suliaqarsimanngisaannarmata.

Atuaruk: Nick Nielsen: Suliamut tunngatillugu paasinngisakka arlaliupput

Ombudsmandimut ingerlatitseqqiisimasoq
Nick Nielsenip ilanngullugu oqaluttuaraa naqqiisoqarnissamut suliaq pillugu ombudsmandimut ingerlatitseqqiisimanini. Namminermi oqarneratut paaserusuppaa Naalakkersuisut siulittaasuata, Siumumeersup, Kim Kielsenip, Naalakkersuisut Siulittaasoqarfiani pisortaasimasoq, Svend Hardenberg, Pituffimmi kiffartuussinissamut isumaqatigiissut annaaneqartoq pillugu Folketingimi oqallittoqarnerata nalaani naqqiissuteqartoqarnissaanut piumasaqarnissaanut piumaffigigamiuk eqqortuliorsimanersoq.

- Paaserusuppara Naalakkersuisut siulittaasuat qinikkamut naqqeeqqusilluni piumasaqarsinnaanersoq, Nick Nielsen oqarpoq.

Imalu nangippoq:

- Soorunami qinigaq partiiminit arlaatigut piumaffigineqarsinnaavoq, kisianni uani Naalakkersuisut siulittaasuata naalakkersuisoqarfimmi pisortaasoq aqqutigalugu qinikkamut naqqeequsilluni piumasaqarpoq. Tassaavorlu Naalakkersuisut siulittaasuata taama iliornera eqqortuunersoq paaserusutara.

Atuaruk: Kielsen: Hardenbergip mailimik nassiussinissaa aalajangigaraara