Sikuki Nuuk Harbour
Grafikki: Nuummi umiarsualivilik ima isikkoqassaaq
Nuummi umiarsumiarsualiviup sananeqarnissaanut suliffeqarfimmut sullissisussamut nassaartoqarpoq. Isumaqatigiissut tamakkerlugu 402 million koruuninik naleqarpoq tamakkiisumillu sanaartortitsisoqassalluni
Nuummi umiarsualiviup allineqarnissaa piviusunngulerpoq.
Sikukip Nuummi umiarsualiviliortussatut suliakkinniarlugu aallartisaataasumillu suliamik aallartitsisussatut toqqagaa Naalakkersuisut sisamanngornermi januaarip 29-anni akuerigaat, Naalakkersuisut nalunaarput.
Tamanna tunngavigalugu Sikuki Nuuk Harbour A/S-ip Per Aarsleff Grønland ApS piumasaqaatitalimmik isumaqatigiissuteqarfigaa Nuummi containerinut nutaamik terminaliliussasoq. Pilersaarusiorlunilu piareersarnerit siulliit maanna aallartinneqarput. Inaarutaasumillu isumaqatigiissut qaammatit marlussuit qaangiuppata piariissangatinneqarpoq, Naalakkersuisut naliliipput.
Isumaqatigiissut tamakkerlugu 402 million koruuninik naleqarpoq tamakkiisumillu sanaartortitsisoqassalluni. Sanaartorneq marsip aallartinnerani aallartinneqassaa 2016-imilu novembarimi piariissangatinneqarluni. Isumaqatigiissummiipput containerinut terminali, ilanngullugu tulattarfik 300 meterit missaanniittoq, containerinut ilioraaffissaq aamma tulattarfiullu eqqaata itisilerneqarnissaa. Sanaartornermi allaffiit, quersuaq sullivillu aamma ilanngunneqassapput, Naalakkersuisut ilisimatitsipput.
Nunaqavissut sulissapput
Sanaartornerni kalaallit annertuumik sulisoriniarneqarput, taakkunani ilinniarsimasut, ilinniarsimanngitsut, praktikkertut ilinniartullu ilaallutik. Kalaallit sulisut katillugit ukiumut piffissaq tamaat 90-iussapput.
Kalaallinik sulisoqarnissaq ilinniartuuteqarnissarlu pingaartitaralugit Aarslef Grønland A/S-ilu isumaqatigiissuteqaratta kalaallinut nuannersuuvoq. Suliniutit taamaattut Kalaallit Nunaanni aningaasarsiornikkut ilorraap tungaanut aallartitsiniaqataassapput, Naalakkersuisut siulittaasuat Kim Kielsen, Siumut, oqaaseqaateqarpoq.
Nuummi umiarsualiviup allineqarnissaanut pilersaarutigineqartut ataani takuneqarsinnaapput