Nauja Lyngemut ingasappallaalersimavoq

'Rigsfællesskabet til debat'-imik pilersitsisoq, Nauja Lynge, tunuarluni Facebookimi quppernermi nakkutilliisuujunnaarniarluni aalajangerpoq.

Tamanna inuttut annertuallaamik kinguneqartitsisimavoq, taanna Sermitsiaq.AG-mut oqarpoq.

- Oqallinneq 2012-mi aallartikkakku ingerlaannartumik Kalaallit Nunaannut sulinerup tungaatigut inuttullu matut tamarmik matuneqartut. Taamanikkut ingerlaqqilaaginnassalluni isumaqarpunga. Kisianni maanna ukiuni tallimani imaannaanngitsumik ingerlasimalerpunga. Kisimiillunga oqallinneq aallartikkiga eqqaamasariaqarpoq, tamannalu nammineq kajumissutsimik ingerlappara, Nauja Lynge oqarpoq.

Sioorasaarneqaqqinnermi kingorna maanna aalajangersimavoq.

- Naalagaaffeqatigiinnermut eqqissisimasumik akerliussutsimik takutitsinermi kingullermik taama pineqarpunga, taanna ilisimatitsivoq.

Assit takukkit: Katerisimasut amerlanngitsut naalagaaffeqatigiinnermut tapersersuisut

Isummanik amerlanerusunik ujartuisoq
Oqallissaarisartoq 2012-mi Nunatsinni aningaasaateqarfinnut oqallinnermik aallartitsiniarluni qinnuteqarpoq. Kisiani aningaasaateqarfiit tamarmik itigartitsipput.

- Namminersulivinnissamut tunngatillugu oqallinnermi isummersuutit amerlanerunngimmata, demokratiimut ajorluinnarneranik isumaqarpoq. Kalaallit Nunaanni partiit tamarmik assigiingajannik anguniagaqarput.

- Taamaattumik tunngavilersuutigineqartut iluamik akerlilerneqarlutik oqallisigineqarneq ajorput. Allatut isumaqalertitsiniarneq oqallitsitsinerma siunertarinngilaa. Illuanik paasititsiniaallunga aamma oqallissaaralunga, taamaalilluta ataatsimoorluta eqqortumik aalajangiisarniassagatta, oqallissaarisartoq erseqqissaavoq.

Imminut toqunnissamik eqqarsarneq
Oqallinnissamik pilersitsiniaraanni, politikkikkut eqqortuusariaqanngitsoq, taanna isumaqarpoq.

- Aamma isummanik allanngortitsiniarluni oqallinnerniunngitsoq. Kisianni uannut tamanna ilungersunarpallaalerpoq. Ukiut arlaqanngitsut qaangiuttut nakkaqqangaarama imminut toqunnissara isumaliutigigaluarpara.

- Allaanngilaq inuit isumaqartut eqqaaviinnaasunga qanorsuaq allaffigineqarsinnaasoq. Najukkannut marluusunut Danmarkimut aamma Kalaallit Nunaannut asanninnera atuuffinnut ingerlatitsisuummat, uanga aamma nammineq inuuninnut kinguneqartitsinikuuvoq, Nauja Lynge naqissusiivoq.

Atuaruk: Danmark kalaallinut eqqaaviussanngilaq

Atuakkiaa saqqummilersoq
Maanna ilaatigut inuttut nakkaqqinnissani ernummatigigamiuk unippoq.

- Oqaluttualiamik saqqummersitsingajalerpunga, tamatumalu maanna ilungersortitsinissaanut piareeqqavunga. Qallunaaq politikeri ilisarisimaneqartoq atuaqataanikuuvoq - taassumalu 'ulorianartutut' taavaa, Nauja Lynge oqarpoq.

Maanna 'ilungersoqqinnginnermini' nukissanik katersiniarsariniarpoq, nammineq oqarpoq.

- Taartissama nassaarineqarnissaata tungaanut Qupperneq oqalliffiusoq soorunami ingerlatissavara. Kisianni taanna atuisunik oqallissaarinernik imaqarallartassaaq, Nauja Lynge oqarpoq.