Narsarsuaq: Paasitinneqanngilagut tusaaniarneqaratalu
Narsarsuarmi innuttaasut siunissamut periarfissatik pillugit kipiluttunartorsiorput, tupigusuutigaallu naalakkersuinermik suliaqartunit tusaaniarneqannginnertik imaluunniit aalajangigaannit nassuaanneqarlutik
Narsarsuup siunissaa pillugu suleqatigiissitaliortoqassasoq neriorsorneqarsimapput. Toqqissisimanissamut aaqqissuussiffigineqarnissaminnik neriorsorneqarsimapput, oqartussaasut suliffittaarnissaannik, initaarnissaannik, meeqqerivimmi inissanik assigisaannillu neriorsorlugit. Neriorsorneqarsimapput suliniutit aallartinneqassasut Narsarsuarmik atatitsisussat nunaqarfiullu siunissaanik qulakkeereqataallutik.
Susoqarsimanngilarli. Aviisi Sermitsiaq taama allaaserisaqarpoq.
Taamaattumik maanna nakkaannalerput, Kangerlussuarlu peqatigalugu qaamaqqutilisarlutik nipaatsumik akerliussutsimik takutitsilersaarlutik novembarip 12-1ni 13-ianiluunniit Inatsisartuni mittarfiliornissap pingajussaaneerneqarnissaa sioqqutilaarlugu. Nipaatsimik, tusaaniarneqanngillammi, Naalakkersuisunit, Inatsisartunit, Kommune Kujallermit tusagassiuutinilluunniit.
Kipiluttunartorsiorneq
Ataasinngornermi novembarip 5-ani unnukkut nunaqarfimmi mittarfilimmi innuttaasut ataatsimiimmata kipiluttunarsorsiorneq ersarippoq.
Ataatsimiinneq nunaqarfiup siulersuisuini kommunalbestyrelsimilu ilaasortamit Naja Lundimit (IA) Ingibjörg Gisladóttirimillu aaqqissuunneqarpoq.
Naja Lund Kangerlussuarmi Sisimiunilu inunnit nipaatsumik akerliussutsimik takutitsinissaminnik soqutiginnittunit attavigineqarsimavoq.
Sumiiffinni makkunani akerliussutsimik takutitsisoqarnissaanik pilersaaruteqarpoq: Narsarsuaq, Narsaq, Kangerlussuaq, Sisimiut aamma Kangaamiut.
Innuttaasut 30-t missaat ataatsimiinnermi peqataapput tassalu nunaqarfiup innuttaasa 25 procentii.
- Misigisimavugut qanorluunniit oqalukkaluarutta soqutaanngitsoq. Tusaarusunneqanngilagut. 2013-imiilli ataatsimiinnerpassuit ingerlanneqarsimapput, imaqarniliortoqarluni, nalunaarusiortoqarluni innuttaasullu sorpassuarnik neriorsorneqarlutik, susoqarsimanngilarli, peqataasut ilaat oqarpoq.
Allaaserisaq tamaat Sermitsiami atuaruk. Uani ataani aviisimut isissutissarsigit: