Mittarfissualiornissat pillugit akerliussutsimik takutitsineq

Inoqarfinni arfinilinni akerliussutsimik takutitsisoqassaaq

Mittarfiliornissat Inatitsisartuni pingajussaa oqallisigineqassaaq novembarip 15-ani sisamanngornermi. Partiinit amerlanerussuteqartunit mittarfiliornissamut siunnersuut tapersersorneqarpoq.

Mittarfiliornissanut akerliusut akerliussutsimik takutitsissasut tusagassiutinut nalunaarutigineqarpoq.

- Oqariartuutiginiarparput mittarfissat inatsisartuni pingajussaaneerlugit oqallisigineqaleraluttuartut, mittarfiliornerup kinguneranik inatsisissami annertuumik eqqugaasussaasugut qulaatiinnarluta aalajangerneq pisussaasoq, Narsarsuarmi akerliussutsimik takutitsinissamut aaqqissueqataasoq Naja Lund tusagassiutinut nalunaarummi allappoq.

Angalaniarneq eqqorneqassasoq

Kangerlussuaq aamma Narsarsuaq toqqaanartumik eqqugaasussaammata akerliussutsimik takutitsisoqassasoq oqaatigaa.

- Illoqarfiit nunaqarfiillu aamma amerlasuut angalaniarnermikkut eqqugaasussaapput. Tassa illoqarfiit mikinerusunik mittarfillit soorlu Paamiut, Maniitsoq, Sisimiut, Aasiaat pinngitsooratik eqqugaasussaallutik taakku avataatigut nunaqarfiit savaateqarfiillu arlaqaqisut eqqugaasussaallutik, Naja Lund oqarpoq.

Inoqarfiit arfinillit

Narsarsuup siunissaa ernumagisorujussuuaa:

- Kujataani Kommune Kujallermi Narsarsuup siunissaa pillugu pilersaarusiorniartoqartaraluartoq taamaattoq suliniummik ataatsimilluunniit suli aallartittoqarsimanngilaq, tamakkulu ukiualuit iluanni pisinnaangitsut ilisimagatsigu Narsarsuarmi annertuumik toqqissisimanngissutaavoq, Qaqortumi mittarfeqalerpat sumut nuuttariaqarnissaq najugassaqarnissaq kiisalu minnerunngitsumik suliffimmik naleqquttumik suliffissaqarnissaq annertuumik ernumassutaavoq uippakajaarnarsigaluttuinnartoq, Naja Lund aaqqissuisut sinnerlugit oqarpoq.

Akerliussutsimik takutitsineq Narsarsuarmi, Kangerlussuarmi, Sisimiuni, Narsami Maniitsumi Kangaamiunilu ingerlanneqassaaq ataasinngorpat. Kangerlussuarmi Sisimiunilu akerliussutsimik takutitsisoqassaaq arfininngorpat, Narsarsuarmi ataasinngorpat ingerlanneqassalluni.

Powered by Labrador CMS