Naalakkersuisut tunniutiinnarput: Arctic Prime Fisheries avaleraasartassiissutinik tunineqarpoq

Naalakkersuisut avaleraasartassiissutinik agguaassisimanerat arlallinnit sakkortuumik isornartorsiorneqarsimapput. Ilaatigut Kommune Kujallermi kommunalpolitikkerit, Arctic Prime Fisheriesimi inuttat Inatsisartunilu ilaasortap, Debora Kleistip (IA) Naalakkersuisut arlalippassuarnik apeqquteqaateqarfigisimavaat, taakkuli ersarissumik akissutigineqartarsimanngillat.

Atuaruk: Avaleraasartoorniarnissamut akuersissummut itigartitsineq nassuiaatitaqanngitsoq

Massakkulli Naalakkersuisut aalajangerput Arctic Prime Fisheries 3.000 tonsinik avaleraasartassiissutinik tunineqassasut aammalu Arsuk Food aamma Sermilik tamarmik immikkut 500 tonsinik avaleraasartassiissutinik tunineqassasut.

- Amerlanerpaat pisassikkumallugit, Aalisarnermut Piniarnermullu Naalakkersuisoq, Kar-Kristian Kruse, tallimanngormat, ulloq 18. august avaleraasartuunik agguaassisoqaqqissasoq aalajangerpoq, Naalakkersuisut tusagassiuutinut nalunaarummi allapput.

Taamaasilluni ingerlatsivinnut Tunumi avaleraasartassiissutigineqarsimasut aalisanngitsoorsimasaat 8.500 tonsit ingerlatsivinnut allanut agguaanneqaqqipput.

Aalisarnermut Piniarnermullu Naalakkersuisoqarfiup avaleraasartuut 4.500 tonsit kingusinnerusukkut pisassanik pisariaqartitsisunut tunniunneqarsinnaaneri siunertaralugu immikkoortippai.

Pisarineqartut ukiut siuliinut marlunnit amerlanerupput

Ukioq manna avaleraasartoorniarneq ingerlalluarpoq, angallatimmi 13-usut maannamut Tunumi avaleraasartuut 37.755 tonsit pisarisimavaat, tassa ukiup siulianut sanilliunnerini 101 tonsinik amerlanerupput, taamani avaleraasartuut ukiumut katillugit 35.654 tonsit pisarineqarsimallutik.

2015-imi pisarineqartut katillugit 30.379 tonsiupput.

Ukioq manna misileraalluni avaleraasartassiissutit katillugit 66.365 tonsiupput.

Aamma atuakkit:

Inuttat kajumissaaruteqarput: Sooruna piumaneqanngitsugut?

- Arctic Prime suliffinnik pilersitsivoq

Pisassiineri apeqquserneqartut

Kujataamiut ileqimisaartuinnarput