Folketingi
Naalagaaffeqatigiinneq pillugu isumasioqatigiit Nuummukarput
Folketingimi partii Alternativet pingasunngornermi kalaallinut qallunaanullu politikkimik isumasioqatigiinnissamik aaqqissuussissapput
Danmarkimi partiit siuariartornerpaat ilaat Alternativet, 'Kalaallit Nunaat pillugu oqallinneq aallarteqqinniarlugu' apriilimili politikkikkut suliniutaasa ilagaat.
Politikkikkut oqaaseqartartoq, Rasmus Nordqvist, apriilip qaammataani Københavnimi Kalaallit Illuutaanni politikkikkut isumasioqatigiisitsinermik aaqqissuussimmat tamanna aallartippoq.
Atuaruk: Qallunaat partiiata nutaap Nunarput pillugu oqallinneq aallarteqqinniarpaat
Aasaaneratalu naannginnerani aaqqissuussaq assingusumik Nuummi ingerlanneqassaaq.
Alternativet kikkunnut tamanut oqallilluni ataatsimiinnissamut pingasunngornermi aggustip 31-ani nalunaaqutaq 16-18 Ukaliusap atuarfianut qaaqqusivoq.
Ataatsimiinnerup nanginnera
Maanna politikkikkut oqaaseqartartoq peqataassanngilaq, taarsiullugu Alternativetip ilaatigut Nunarput pillugu oqaaseqartartua, Roger Matthisen peqataassaaq.
Nuummi ataatsimiinneq apriilimi Københavnimi ataatsimiinnerup nanginneriumaaraa, partiiå ineriartortup neriuutigaa.
Folketingip Kalaallit Nunaat pillugu ataatsimiititaliaata Nunatsinniinneranut atatillugu Roger Matthisen tikeraarpoq.
Atuaruk: Nunarput pillugu ataatsimiititaliaq Aleqa Hammondertaqarani tikeraalertoq