mingutsitsineq
Misissuineq nutaaq: Sakkutooqarfik atomreaktorilik sermimit saqqummissaaq
Amerikamiut sakkutooqarfiat Camp Century, Sorsunnersuup Nillertup nalaani Sermersuup ataani pilersissimasaat, ukiut 75-it ingerlanerini ajornartorisiutinngoratarsinnaavoq
Ilisimatuutut misissuinikkut allaaserisap nutaap, nunap iluani sakkutooqarfiusimasoq amerikamiut Sermersuup naqqani sanaartorsimasaat, Camp Century, mingutsitsilluni ajornartorsiutinngoratarsinnaasoq tikkuarpaa.
Ilisimatuut pingasunngornermi allaaserisamik saqqummiussisut nalilerpaat, sakkutooqarfiusimasoq Sermersuarmut aamma immamut mingutsitsinermik siaruaatsitsilersinnaasoq.
Mashable.com taama allappoq.
Camp Century sakkutooqarfiusimavoq Sermersuup iluani takisuunik torsuusarsualik, taanna Kitaata sineriaani avannarpasissumi sineriammit kilometerit 20-t missaani isorartutigisumi inissisimavoq.
Sermip ataani eqqaavik
Rakettinik aallartitsinissamik misiliinissaq siunertaralugu taanna sananeqarpoq. Kingusinnerusukkut taanna qimanneqarpoq.
Sermip ataani suli ullumikkut atomreaktori minnerusoq amerikamiullu qimataat allat tassaniipput.
Ulorianartorsiorneranngikkaat
Taamaammallu Camp Century eqqaaviuvoq poortorneqarsimasoq, taannalu ukiut 75-t tulliuttut ingerlanerini maangaannaq Sermersuup qaavani aamma sineriammi immamut mingutsitseratarsinnaasoq, misissuinermik allaaserisap takutippaa.
Sermitsiaq.AG-p sakkutooqarfiusimasoq arlaleriarluni allaaserisarpaa, naalagaaffiup ilaatigut avatangiisinut annerusumik ulorianartorsiortitsinnginnerartarpaa.
Atuaruk: Lidegaard: Camp Centurymi imikoq ulorianartoqanngilaq
Kisianni ilisimatuut allaaserinnittut ernumassuteqarput.
- Isumaqatigiissummi taamanikkut siunissami silap pissusia qanoq innissaa eqqarsaatigineqarsimanngilaq, Liam Colagan, York Universitetimi ilisimatusartoq Mashablemut oqarpoq.
- Tassani apiuaannartuunissaa naatsorsuutigineqarsimavoq.
Eqqagarparujussuit
Sermersuup iluani 36 meterit missaaniittumi ullumikkut eqqakkat 9.200 tonsit maaniinnarmiipput, taakku Amerikami sakkutuut apriilimi 1966-imi sakkutooqarfimmit aallaramik, ukiut 12-t tassaneereerlutik qimaannarnikuuaat.
Taakku igitat qimaannakkat timmisartorsuarnut Airbus380-itut initutigisut ilisimatuut nalilerpaat, aammalu ikummatissaq avatangiisinut ulorianartunik akulik 20.000 liiteri tassaniinnerarpaat.
Tamakku saniatigut ilisimatuut 20 millionit literit eqqakkat - eqqakkat aqqutaaneernerusut - aamma reaktorimi nillusaat qinngornernik ulorianartoqartoq piffissami sivisuumi sermip ataaniittussat ernummatigaat.
Ilisimatuutut misissuinermit mingutsitseratarsinnaanermik allaaserisaq uani atuarneqarsinnaavoq.