kuuttoorneq

Lidegaard: Camp Centurymi imikoq ulorianartoqanngilaq

Doris Jakobsenimut akissutitigut arlalitsigut nunanut allanut ministerip Martin Lidegaardip paasissutissiissutigaa Camp Century-mi radio-p qinngornerinik ulorianartunik ulorianartoqarunanngitsoq

Doris Jakbosenip akissuteqarfigineqarpoq imeq radiop qinngorneranik ulorianartumik akulik qanoq annertutigisoq Camp Centurymi, Thulemit 220 kilometerinik ungasissusilimmiittumi, aniatinnearsimanersoq. Sakkutuut tassani sulisut oqarsimapput atomimik ulorianartumik aniatitsisoqarsimasoq.

– Nuannaarutigaara Nunanut Allanut Ministerip apeqqutigisannut avaqqutaariniarunnaarluni akissuteqarmat. Akissutaasut naappertorlugit erngup qinnornernit ulorianartunit akullip Camp Centurymiit Sermersuarmut kuutsinneqarsimanerani navianartunik kinguneqarsimagunanngitsoq. Tamannalu soorunami nuannaarutigaara.
Aamma atuaruk: Sermersuarmi atomimik aniasoortoqartoq
Martin Lidegaard-ip akissutaani erseqqissaatigineqarpoq Amerikkarmiut imermik mingutinneqarsimasumik kuutsitsisinnaatitaanerat Danmarkimi Risø-mi atomip nukinganik misileraavittut nukissiorfiup maanna matuneqarsimasup Roskilde-p Kangerluanut kuutsisinnaatitaaneranut naleqqiullugu 0,5 procentiinnaanik annertussuseqarsinnaasoq. Camp Centurymi aniatissinnaasat qaallunaat napparsimmaviini kuuffinnut aniatissinnaasanit annikinnerupput.
Akissuteqarnermi tunuliaqutit eqqumiigai
Doris Jakobsen-ip eqqumiigaa Nunanut Allanut Ministereqarfiup akissuteqarnermini Dansk Uderigspolitisk Instituttimiit nalunaarusiaq ammalu amerikamiut sakkutooqarfianniit nalunaarusiat nutaanngitsut tunulequtarisimammagit. Akissuteqaatini erseqqissaatigineqarpoq taamani isumaqatigiissutaasimasoq Danskit Naalakkersuisui toqqaanartumik igitat qinngornernit navianartunit mingutsinneqarsimasut aammalu teknikikkut allannguutit isumannaallissanermut sunniuteqarsinnaasut pillugit ilisimatinneqartassasut.
– Akissutit naapertorlugit Danskit Naalakkersuisui nammineq nalunaarusianik peqartussaagaluarput. Eqqumiigaara nalunaarusiat tamakkua atorneqarsimannginnerat. Maanna neriuutigiinnalerpara amerikkarmiut ingerlassimasaanni mingutsitsisimanernik isertugaasunillu paasissutissanik nutaanik puttuttoqassanngitsoq, Doris Jakobsen oqarpoq.
Amerikarmiut nunatsinni nammineerluinnarsimapput
Amerikamiut Camp Century sanaleramikku Danmarki apereqqaarnagu aallartissimapput. Kingusiinnakkullu suliap nanginneqarnissaanut akuersissummik Udenrigspolitisk Nævn-imit tunineqarsimallutik.
– Takusinnaavara USA-p Camp Century sanaleramikku Danmarki akuersissummik qinnuvigeqqaarsimanngikkaat. Danskit Amerikkallu Illersornissamut Ministerii amerikamiut missilit atorlugit eqqornaveeqqusiorniarnerminnut atatillugu Thulebasip nutarteqqinneqaqqinnissanik isumaliutaat aammalu Igalikumi Isumaqatigiissut pillugu paasinninnerat pillugit apeqquteqarfiginikuuvakka. Iluamilli akineqarnanga. Neriuutigaara USA nunatsinni Kallallit Nunaat Danmarkillu akuersiteqqaarnagit nutaanik aallartitsisimassanngitsut. Tassami Camp Century-mi qanoq pisoqarsimanersoq ministerqarfiup maana nassuiaatigereermagu, Doris Jakobsen oqarpoq.

Powered by Labrador CMS