takornariartitsineq
Lonely Planetip innersuussaanni Kalaallit Nunaat qulit akornaniittoq
Visit Greenlandimi ullumikkut tulluusimaarnissamut peqqutissaqarpoq
Angalanermut najoqqutassianik saqqummersitsisartut nunarsuarmi tusaamaneqarnerpaat aamma maligassiuilluarnerpaat, Lonely Planet, takornariarfissat pilerinarnerpaat qulit ukiumoortumik saqqummiuttakkaminni Kalaallit Nunaat ukiuni aggersuni takornariartariaqakkatut ilannguppaat.
Tamanna angalanermut najoqqutassiami tusaamaneqartumi 'Best in Travel 2016'-imi saqqummiussinermut atatillugu saqqummersinneqarpoq.
Kalaallit Nunaat qulingiluaattut
- Taamaattoqarnerata paasitippaanga, immitsinnut nittarsaannitsinnut pikkorinnerulersimasugut aammalu ersarinnerulersimasugut, assersuutigalugu greenland.com, qaammatit tamaasa alakkarneqartarnera annertusiartuinnartoq.
Nunat qulit toqqarneqartut akornananniipput Botwana ajugaasoq, aammalu Letland, Polen kiisalu qeqertat Palau. Kalaallit Nunaat qulingiluaattut inissippoq, Fijilu qulingannut.
Lonely Planet toqqaanerminut tunngavilersuinermini allappaa, nittartakkut attaveqaatiminni atuisut angalaffissat sorliit 2016-imi angallaffiulluartussat toqqarneqarnissaannut peqataatinneqarsimasut.
Naggataatigulli Lonely Planetip ilisimatuuisa angalaffissat qiimmatsaassutaasinnaasut aamma tupigutsannartoqarsinnaasut toqqarpaat.
Lonely Planet ukuini 40-ni atanikuuvoq, ukiunilu taakkunani atuakkat angalanermut tunngasut 130 millionit sinnillit naqiternikuuaat, nunarsuaq tamakkerlugu angalavinnik imaqartunik.
Atuaruk: Takornariat aatsaat taama amerlatigisut