ny formand
Kuupik Kleist Nuuk Imermi siulittaasunngorpoq
Naalakkersuisut siulittaasorisimasaat Kuupik Kleist maqiterivissuarmi Nuuk Imermi siulittaasutut toqqarneqarpoq.
Nuuk Imermi immiaaqqanik imeruersaatinik aamma sodavandinik maqiteriviusartumi immikkut ittumik ataatsimeersuarnermi Naalakkersuisut siulittaasorisimasaat Kuupik Kleist siulersuisunut siulittaasutut toqqarneqarpoq.
Kommuneqarfik Sermersooq tusagassiuutinut nalunaarummi taama allappoq.
- Isumaqarpunga, Kuupik taannaasoq suliffeqarfiup soqutigisaanik aallussisuusinnaalluartoq, kommunitsinnilu suliffiit 48-nut tunngatillugu siunissami qulakkeerinnissinnaassuseqartuusoq, Kommuneqarfik Sermersuumi borgmesteri Asii Chemnitz Narup taama oqarpoq.
Matunissamut aarlerinartorsiortoq
Kuupik Kleist piffissami tulliuttumi ulapputissaqarumaartoq qularnanngilaq.
Naalakkersuisut poortuutinut inatsisip allanngortinneqarnissaa isumaliutigimmassuk, Nuuk Imeq maanna matunissaminut aarlerinartorsiorpoq. Nuuk Imeq tamatuma unammilleqatigiinnermut illersugaajunnaarsissagaluarpaa, taamaalilluni immiaaqqanik maqiteriviit nunarsuarmi unammilleqatigilerlugit. Taamatut pisoqassappat suliffeqarfik ingerlasinnaassanngilaq.
Aamma atuaruk: Nuuk Imermi sulisut siunissartik ernumassutigaat
- Kuupik Kleist politikkikkut misilittagaqarluarnera pillugu siulersuisunut siulittaasutut toqqarneqarpoq. Nuuk Imermi niuarnikkut toqqammavia naluneqanngitsutut immiaaqqat puui avammut ammaanneqarnerat pillugu nalunaarummit nalorninartorsiortinneqalerpoq, Naalakkersuisunillu isumaqatigiiinniarneq suliffeqarfiup siunissaanut aalajangiisuussaaq, tusagassiuutinut nalunaarummi oqaatigineqarpoq.
Sermitsiaq.AG-p siulersuisuni siulittaasunngortumik oqaaseqartitsinissani sulissutigaa.