Nuuk Imermi sulisut siunissartik ernumassutigaat

- Nuuk Imermi sulisut 42-ruupput, amerlanersaalli ilinniagaqarsimasuunatik.

Nuuk Imermi sulisut siunissaminnut ernumasut, tusagassiuutinut nalunaarumminni taama allapput. Nuuk Imeq 2018 naalernerani matoriaannaavoq.

- Sulisut 36-it ilinniagaqarsimasuunngillat SIK-mulli ilaasortaapput, maqiterivik matuneqassangaluarpat aalajangiunneqaraluarpat sulerissanerlutik naluaat, Nuuk Imermi sulisut allapput.

Atuaruk: Maqiterivik sodavandinik immiaaqqanillu amerlanerusunik tunisaqartoq

Eqqagassarpassuaqassaaq

Namminersornerullutik Oqartussat poortuinermut inatsit allanngortinniarneqarpoq, tassani pineqarlutik qillertuusat poortuutissarlu ataasiaannarluni atorneqartartut, tamannalu politikerinut allannguiniartunut apeqquserneqarpoq.

- Puukummi maqiterivimmut utertinneqartartut 98 procentiupput. Iliiuserineqartoq ajorsimanngilaq. Nunarsuarmilu maqitsiveqarfinni pitsaassuseq eqqarsaatigissagaanni Nuuk Imeq pitsaanerpaanut ilaalluni.

- Siunissami aqqusinerni qillertuusarpassuarnik tamaagaannaq igitanik takusalissaagut, taamaammat eqqumiigivarput maqiteriviup matuneqarniarnera. Takusinnaalereerparpummi energi drinkit eqqunneqarnerata kingorna. Aqqusinerni pinngortitamilu qillertuusarpassuaqarpoq. Siunissamilu suli amerlanerusunik takusalernissarput aarlerinartoqartillugu Nuuk Imermi sulisut oqarput. Nunatsinni eqqagassanik katersisarneq inuiaqatigiinnut akisuujusoq sulisut tikkuarpaat.

Nunatsinnilu takornariaqarnikkut kingunerlitsitseriaannaasoq oqaatigaa.

- Siunissami takornarissat amerlisarneqarnissaat maanna sulissutigineqarpoq. Pinngortitami qillertuusanik isiginnaartissavagut? q Suliffeqarfinnik maatooraaniarneq saniatigullu namminiilivinniarluni oqalunneq tupinnaqaaq. Imminut ataqatigiinngitoqanngitsoq Nuuk Imermi sulisut oqarput, taakkuli politikerinut siunnersuipput suliffeqarfik matutinnagu eqqarsarluaqqullugit.

Atuaruk: Nuuk Imeq matuneqarnissamut innersuussutigineqartoq