Sermersooq
Kommunalbestyrelsip ''ajorniartarneq'' taamaatinniarpaa
Borgmester Asii Chemnitz Narup, Kommuneqarfik Sermersooq, politikkikkut sulinermi oqallinnermi ileqqorissaarnissamut malittarisassanik pilersitsisoqarnissaanut aalajangiiffissatut siunnersuummi taperserneqarluarpoq.
Kommuneqarfik Sermersuumi kommunalbestyrelsip marlunngornermi ataatsimiinnerani siunnersuutip suliarineqarnerani tamanna takuneqarsinnaavoq.
Aamma atuaruk: Borgmesterip ajorniarumatusarneq iluarsiiffigerusuppaa
Kommunimi politikerit akornanni oqalliseriaaseq ''ajorneruniarluni, sangutitsiniaalluni, assuarliilluni aamma nakkarsaalluni'' pisinnaasarpoq, borgmesteri naqissusiivoq, taassuma politikerit iliuuseqarlutik salliuniarlutik isumaqatigiinnerat nuannaarutigaa.
Siunissami pisussat
- Siunnersuutinni siunissami demokratiimi nuannaarnermik pilersitsinissamik anguniagaqarneq pingaarnerpaavoq. Atuuffigissallugu kajuminnartoq, isummanik avitseqatigiinneq nuannersoq aamma ammasumik ataqqinnittumillu isumaqatigiinnginnermut inissaqartitsiffiusoq, tamaannalu meerartatsinnut inuusuttortatsinnullu ilikkartissavarput, Asii Chemnitz Narup Sermitsiaq.AG-mut oqarpoq.
- Maanna siunnersuuut suliareqqissallugu tunngaviusumik isummiussisoqarpoq, borgmesteri ilisimatitsivoq, ilanngullugulu oqaatigaa aqutsisoqarfiup tamanna akisussaaffigissagaa.
Sinaakkutit
Kommunalbestyrelsip nutaap maajimi inissinnerata kingorna, politikerit akornanni pitsaasumik oqallittarnissaannut sinaakkutit aalajangiunneqarnissaat taassuma naatsorsuutigaa.