Borgmesterip ajorniarumatusarneq iluarsiiffigerusuppaa

Borgmester Asii Chemnitz Narup, Kommuneqarfik Sermersooq, aalajangiiffissatut siunnersuummik saqqummiussivoq, politikkikkut sulinermi pitsaasumik attaveqatigiinnissamik malittarisassanik aamma politikerit naapittarneranni tamanna kinguneqassaaq.

Pisariaqanngitsumik sakkortuumik nipaqartarneq
Siunnersuut kommunalbestyrelsimi kommunimut apriilip sisamaani qinersinissaq sioqqullugu ataatsimiinnissami kingullermi suliarineqassaaq, borgmesterillu IA-meersup siunnersuut ima tunngavilersorpaa:

- Qinikkatut sulinermi sakkortuumik pisariaqanngitsumik nipeqartarneq, aammalu innuttaasunut politikkikkut aaqqiissutissanut imaluunniit innuttaasut qinikkat sulinerannik paasinnittarnerannut iluaqutaarpiarneq ajornerat nassuerutigalugu, Kommuneqarfik Sermersuumi Kommunalbestyrelsimi qinikkatut sulinermi, qinikkatullu pitsaasumik attaveqaqatigiittarnissamik ataatsimoortumik malittarisassaliortoqarnissaa piffissanngorsoraara.

Akornutaasariaqanngitsoq
''Isumaqatigiinngittaraluaruttaluunniit, innuttaasunut pitsaanerpaanik aaqqiissuteqarnissatsinnut pisussaaffeqartugut. Taamaattumik oqalliseriaaseq attaveqaqatigeeriaaserlu soorunami tamatumunnga akornutaasariaqanngilaq'', borgmesteri isumaqarpoq.

''Politikkikkut sulinermi malittarisassat'' aamma tamanna iluaqutigalugu kommunalbestyrelsimut ilaasortanngortussanut siunissami pitsaasumik suleqatigeeriaaseqarnissamut oqalliseriaaseqarnissamullu aamma tunngaviliisuujumaartoq neriuutigaa.

- Politikkikkut oqallittarneq sakkortuujusinnaavoq, ersarissunik paatsuugassaanngitsunik isummertarnikkut nalunaaruteqartarnikkullu - kisianni ajorniarnerusariaqanngilaq, sangutitsiniaataanani, assuarliinerunani, nakkarsaanerunani il.il.. Oqalliseriaaseq suliamut, politikkikkullu assigiinngitsunik isummersortarnermut tunngatiinnarneqarsinnaavoq, maanna borgmesteriusoq siunnersuutini nassuiaateqarfigaa, neriuutigaalu taperserneqassasoq taamaalilluni ''ataatsimiititaliat eqqortut'' malittarisassanik suliaqarniassammata.

Justus Hansenip borgmesteri taperserpaa
Borgmesterip sinniisuata siulliup Justus Hansenip borgmesterip siunnersuutaa tapersersorluinnarlugu Sermitsiaq.AG-mut ilisimatitsivoq.

- Nipi sakkortuseriarnikuusoq nammineq misiginikuuara. Ajoraluartumik, Justus Hansen Demokraatineersoq oqarpoq.

Taassuma aamma kommunimi politikerit kommunimi ingerlatsisut pissuserissaarneq qaangerlugu pisoqarsimasoq assersuutigalugu ilisimatitsissutigaa, taakku ingerlatsisut illuinnaasiunngitsumik sulinermik pasillerfigineqarnikuupput.

Isumassarsiatsialak
- Taamaattumik malittarisassaqalernissaq isumassarsiatsialaavoq, taamaalilluni kommunalbestyrelsinngortussat malittarisassaqarniassapput, borgmesterip sinniisua oqarpoq.