KNR
KNRip siulersuisui politikkikkut naaperiarfiupput
KNRip siulersuisuisa katitigaanerat siunissami allannguuteqartussanngorpoq
Naalakkersuisut illuatungiliuttullu KNRip siulersuisuisa katitigaanerat pillugu oqallinnermi imminnut naaperiarfeqarput. Siulersuisuni ilaasortat marluk Naalakkersuisut toqqartarniarpaat ilaasortat sinneri allanit toqqarneqartassasut.
Atuaruk: Naalakkersuisut KNRimut pissaaneqarnerorusupput
Radiokkut tv-kkullu aallakaatitsisarnermut Inatsisartut inatsissaattut siunnersuut Inatsisartut sisamanngorpat oqaluuserissavaat. Taanna siunnersuummik aappassaanneerineruvoq maannalu Inatsisartut kultureqarnermut, ilinniartitaanermut, ilisimatusarnermut ilageeqarnermullu ataatsimiititaliaat isumaliutissiissumminik saqqummiussivoq siunnersuutigineqartullu allannguutissaanik taanna imaqarpoq. Naalakkersuisut siunnersuutigigaluarpaat KNRip siulersuisuini ilaasortat arfineq marlunniit tallimanut ikilissasut aammalu siulersuisut tallimaannanngorpata taakkunannga sisamat toqqartarniarlugit.
Kultureqarnermut, ilinniartitaanermut, ilisimatusarnermut ilageeqarnermullu ataatsimiititaliaq aamma ilinniartitaanermut kulturimut, ilageeqarnermut naliissitaanermullu naalakkersuisumik Nick Nielsenimik Siumumeersumik isumasioqateqarsimavoq siunnersuutip ataatsimititaliami suliarineqarneranut atatillugu.
Ilaasortat imatut toqqarneqartassapput
Inuit Ataqatigiit aamma Demokraatit KNRimi siulersuisut sisamat Naalakkersuisuni toqqarneqartalernissaannut akerliupput isumaqaramik demokratii taamaasilluni nukillaajallatsinneqassasoq. Atassutip piareersimaffigereerpaa allannguutaasinnaasunik eqqartueqataanissanit. Naalakkersuisut allannguinissaq aamma piareersimaffigaat.
Nick Nielsen ataatsimiitaliamut ilisimatitsisimavoq aaqqissuussinissap allanngortinissaa piareersimaffigalugu taamalu siulersuisuni ilaasortat marluk kisiisa toqqartalerniarlugit. Ataatsimiititaliap isumaqatigiissup inassutigaa Naalakkersuisut siulittaasoq siulersuisunilu ilaasortaq ataaseq toqqartassagaat. Ilaasortat marluk tusagassiornermut institutimiit eqqumiitsuliortullu suleqatigiiffiannit Epimit toqqarneqartalissasut. Ilaasortaq ataaseq KNRmi sulisut toqqartassavaat.
Siunnersuut maajip 28-at pingajussaanneerneqassaaq.