Naalakkersuisut KNR-imut pissaaneqarnerorusupput

KNR-ip siulersuisuini arfineq-marlunnik ilaasortaqarput, ilaasortat marluk Naalakkersuisunit toqqarneqartarlutik. Toqqarneqartuni aappaa siulersuisuni siulittaasuuvoq.

Inatsisartut upernaanerani ataatsimiilerpata Naalakkersuisut tamanna allanngortinniarlugu siunersuuteqarniarput.

Inatsisissamik siunersuut akuerineqassappat KNR-imi siulersuisunut ilaasortat tallimaalissapput, ilaasortanilu tallimani sisamat Naalakkersuisunit toqqarneqartassallutik.

Allannguutissatut siunnersuutit KNR-imi aqutsinermut nukittorsaataassasut, aamma siulersuisut sunniuteqarluarnerunissaat aalajangiisinnaassusaallu nukittorsaataassasoq Naalakkersuisut ilaatigut allapput.

Inatsisissamulli siunersuut Danmarks medie- og journalisthøjskolemi tusagassiuutit pillugit inatsisilerituup Oluf Jørgensenip isornartoqartippaa.

- Pingaartuuvoq inuiqatigiit oqartussaaqataaffianni tusagassiuutit kiffaanngissuseqarnissaat. Naalakkersuisuninngaanniit aqunneqartussaanngillat. Taamaammat tulluanngilaq KNR-ip siulersuisuini ilaasortat amerlanerit Naalakkersuisut toqqartalerpagit, Oluf Jørgensen Radioavisimut oqarpoq.

- Pingaartuuvoq tusagassiorneq Naalakkersuisuniit sunnerneqannginnissaa, aamma KNR-ip siulersuisui amerlanerussuteqartut Naalakkeruisuniit toqqarneqartalerpata inuiaqatigiit tusagassiuutinut tatiginninnerat ajornakusuulersinnaavoq, Oluf Jørgensen KNR-imut nangilluni oqarpoq.

Ilinniartitaanermut, ilageeqarnermut, kultureqarnermut naligiissitaanermullu naalakkersuisup Nick Nielsenip tusagassiuutit pillugit inatsisilerituumit isornartorsiorneqarnertik isumaqatiginngilaa.

- Isumaqarpunga aarlerinartoqanngitsoq. Uani eqqarsaatigineqartariaqarami Naalakkersuisut toqqaanerminni tunuliaqutigivaat pisinnaasat tunuliaqutit.Taakkua toqqammavigalugit ingerlatsinissaq aallaaviujuaannassaaq. Politikkikkut aqunneqarnissaa Naalakkersuisuninngaanniit oqariartuutaanngilaq, Nick Nielsen oqarpoq.

Inatsisartut upernaanerani ataatsimiinnissaat marlunngornermi martsip 18-anni aallartissaaq.