Aalisarneq
KNAPK Sulisitsisullu patajaatsumik aalisarnermut politikkimik ujartuipput
Kalaallit Nunaata sulisussanik eqqussuisariaqarnera, patajaanngitsumik politikkeqarnermik pissuteqarpoq, Henrik Leth aamma Henrik Sandgreen isumaqarput
Piniartut aalisartullu kattuffiat KNAPK aamma Sulisitsisut, Hans Enoksen piniarnermut aalisarnermullu naalakkersuisunngormat pilluaqquaat.
Henrik Sandgreenio KNAPK-meersup aamma Henrik Lethip Sulisitsisuneersup naalakkersuisunngortumik suleqateqarnissaq qilanaaraat, saniatigullu inissisimavimmi pineqartumi patajaannerusumik ingerlasoqarnissaa ujartorpaat. Ukiut sisamat ingerlanerinnaanni aalisarnermut naalakkersuisut tallimaapput.
- Aalisarneq nunatta inussutissarsiutaasa pingaarnersaraat, maannalu tassani politikkikkut eqqissisimanissaq aammalu inussutissarsiutip aningaasarsiornermi patajaatsumik inissinissaanut piujuaannartitsinissarlu tunngavigalugu ingerlanissamut, taamallu aningaasaliissutit pisariaqartinneqartut sapinngisamik amerlanerpaanik suliffinnik pilersitsisussat pissarsiarilersinnaanissaannut, aaliangiilluinnartussaapput, taakku tusagassiuutinut nalunaarummi allapput.
Atuaruk: Naalakkersuisunut ilaasortat nutaat aajuku
Politikki kukkusoq
Sammivimmi pingaartumi ataatsimi KNAPK aamma GE ingerlatsinermut atasumik isumaqatigiinngissuteqarsimapput, maanna aalisakkanik tunisassiornerup tungaanit Kinamit sulisussanik tikisitsinissamik oqalunnermik kinguneqalersumik, nunatsinni sulisussanik pisariaqartinneqartunik pissarsisinnaanerup ajornartorsiutaanera pissutigalugu.
- Tassanilu pissutaasut ilagivaat kukkusumik aalisarnermut politikkeqarsimaneq.
Qaninnerusumik oqaloqatigiinneq
Nunami aalisakkanik suliarinnittussat ikinnerulersinneqarsimanerat, aamma aalisariutinut inuttassarsiornermi ajornartorsiulersimaneq taakku oqaatigaat.
- Kukkusumik aalisarsinnaanermut akuersissutinik tunioraaneq peqqutigalugu aalisartut aningaasaqarnikkut ajornartorsiuteqartitaalerput, aalisakkanik tunisassiorfiit qaaffasinnerusunik aningaasartuuteqartitaalerlutik nunamilu sulisussaqarniarneq sanngiillisinneqarluni, tunisassiorneq naammaginartumik ingerlasinnaanngimmat, KNAPK aamma Sulisitsisut oqariartuuteqarput.
- Nunami aalisakkerivinni sulisussaaleqisoqarneratigut aalisakkanik tigooraasinnaanerit ajornerulersinneqarput taamallu umiarsuarnik tigooqqaasussanik piumasaqalernernik kinguneqartitsissoqalerluni, kattuffiit taama allapput.
Maanna qanilaarnerusumik Hans Enoksenimik oqaloqateqarnissartik taamaammat neriuutigaat.
Atuaruk: Kinamiut 30-t tunisassiorfinni sulissapput