Skærpelse af dom
Kinguaassiuutitigut atornerluisoq sakkortunermik eqqartuunneqarpoq
Qaasuitsup Eqqartuussiviata 40-nik ukiulimmut Iginniarfimmeersumut Kasper Brandtimut eqqartuussutaa, Nunatta Eqqartuussisuuneqarfiata atortussanngortippaa, kiisalu tavatsitseriarsimasutut, Qaasuitsup Eqqartuussivianit pinngitsuutinneqarfigisimasaanut, pisuutillugu
Iginniarfimmiup 40-nik ukiullip Kasper Brandtip, arlaleriarluni pinngitsaaliisimasutut peqquserluuteqarsimasutullu pineqaatissinneqarsimasup, eqqartuussutaata ingerlateqqinneqarnera Nunatta Eqqartuussiviata sapaatip akunnerani kingullermi suliaraa.
Nunatta Eqqartuussisuuneqarfia ingerlatitseqqiinermi pineqartumi ullumi, pingasunngornermi, eqqartuussivoq.
Kasper Brandt niviarsiaqqanut arnanullu 15-iniit 21-nut ukiulinnut arfineq-marlunnut, nukappiaqqamullu qulingiluanik ukiulimmut kinguaassiuutitigut atornerluisimasut siorna decembarimi eqqartuunneqarpoq.
Qaasuitsup Eqqartuussiviata eqqartuussutaa Nunatta Eqqartuussisuuneqarfiata sakkortusaavigaa, Kasper Brandtimi aamma tavatsitseriarnermut, Qaasuitsup Eqqartuussivianit pinngitsuutinneqarfigisimasaminut, pisuutinneqarami.
- Nunatta Eqqartuussisuuneqarfiata eqqartuussutimini pingaartippaa unnerluutigineqartup piginnaaneqarnerunerminik atornerluinissani siunertaralugu pinerlineqartunik atoqatiginnittarsimanera, taamaattumik eqqartuussisut unnerluutigineqartoq unnerluussissut malillugu tavatsitseriarnermut pisuutippaat, Nunatta Eqqartuussisuuneqarfia taama ilisimatitsivoq.
Nunatta Eqqartuussisuuneqarfiata piffissami killiligaanngitsumi parnaarussivissuarmi Herstedvesterimiittussanngorlugu eqqartuunneqarnera atuuttussanngortippaa.
Atuaruk: Eqqartuussisoqalerpoq: Kinguaassiuutitigut atornerluisup erloqinassusia
Taarsiissutissat amerlaneqarput
Qaasuitsup Eqqartuussiviata mitaanermut taarsiissuteqarnissamik aalajangiinera Nunatta Eqqartuussisuuneqarfiata aamma atuuttussanngortippaa, pisimasunilu marlunni aningaasat taarsiissutissat amerlivai, pinerlineqartut pinerlunnerup nalaani ukiui kiisalu pisimasut qanoq ittuuneri tunngavilersuutigalugit.
Kasper Brandt aamma Qaasuitsup Eqqartuussiviani decembarimi eqqartuunneqarpoq mitaanermut taarsiissutinik katillugit 330.000 koruunit missaanniittunik akiliisussanngortinneqarluni.
Eqqartuussut taanna Kasper Brandtip Nunatta Eqqartuussisuuneqarfianut suliareqqitassanngortippaa, kissaatigalugu pisimasuni marlunni pinngitsuutitsisoqassasoq kiisalu pisimasut sinnerinut tunngatillugu sakkukinnerusumik eqqartuussisoqassasoq.
Atuaruk: Angut kinguaassiuutitigut arlaleriarluni atornerluisimanini pissutigalugu pillarneqartoq
Ingerlatitseqqiineq Kasper Brandtilu pillugu allaaserisat AG-mi saqqummersumi nutaami atuakkit. Aviisi ugguuna pisiariuk: