tupannartoq
Angut kinguaassiuutitigut arlaleriarluni atornerluisimanini pissutigalugu pillarneqartoq
Qaasuitsup Eqqartuussiviani angut 40-nik ukiulik piffissaligaanngitsumik parnaarussivissuarmi Herstedvesterimiittussanngorlugu pillarneqarpoq. Niviarsiaqqanik arnanillu arfineq marlunnik kiisalu nukappiaqqamik kinguaassiuutitigut atornerluisimanini pissutigalugu angut pillarneqarpoq
Angut 40-nik ukiulik nunaqarfimmi Kangaatsiap eqqaaniittumi Iginniarfimmeersoq inuusuttuaqqat ornittagaanni peqquserlulluni pisortaasoq kommunini inuusuttuaqqallu ornittagaanni ilinniartitsisarlunilu perorsaasuuvoq.
Qaasuitsup Eqqartuussiviani eqqartuunneqarnermini kinguaassiuutitigut atornerluisimasutut, kanngutsaatsuliorsimasutut, peqquserlunnikkut, kinguaassiuutitigut atornerlueriarsimasutut kanngutsaatsulioriarsimasutullu pillarneqarpoq.
- Suliaq tupannangaartuuvoq. Pillarneqartoq arlaleriarluni peqquserlulluni inuusuttuaqqat ornittagaanni pisortatut atorfeqartuusaartarsimavoq. Tamanna atornerlullugu niviarsiaqqanik 15-nik 16-nillu ukiullit pingasut atornerlussimavai kinguaassiuutitigullu atornerloriaraluarlugit. Naakkitsaatsuliorneri pissutigalugit inatsit najoqqutaralugu sakkortunerpaamik pillarneqarpoq. Tamanna unnerluussisutut nuannaarutigaara, Politimestereqarfimmi unnerluussisutut atorfeqartoq Tanja Søderlund oqarpoq.
Niviarsiaqqat arnat nukappiararlu
Angut arlaleriarluni eqqunngitsumik timimik sungiusaasutut kiisalu inuusuttut ornittagaanni pisortatut atorfeqarsimasutut imminut taasarsimasoq eqqartuussivimmit uppernarsarneqarpoq. Inuusuttuaqqat atuartinneqartarsimapput perorsarneqarlutillu kommunini tassanngaanniillu kinguaassiuutitigut atornerluisarluni.
Eqqartuussivimmit angut 40-nik ukiulik pillarneqartoq 2007-mit 2014 ilanngullugu taamatut iliuuseqartarsimavoq. Iginniarfimmi Aasiannilu niviarsiaqqat arnallu 15-nit 21-nut ukiullit atornerlunneqarsimapput kiisalu nukappiaraq qulingiluanik ukiulik kinguaassiuutitigut atornerlunneqarluni.
Kommunit akisussaasut
Unnerluussisoq Tanja Søderlund oqarpoq inuusuttuaqqat ornittarfii Qeqqata Kommuniani Maniitsumi allattoqarfik Kommune Kujallermiittullu akisussaaffimminnik qimarratiginnissimasut.
- Inunnut amerlasuunut pisut peqqutigalugit kinguneqarnerluppoq. Inuusuttut ornittarfii kommunillu tamanna akisussaaffigaat. Angut ilinniarnikuusimasaminik allagartaqarnani atorfeqartarsimanera aamma suliami immikkut isigineqarsinnaavoq ilungersunartoq, Tanja Søderlund oqarpoq.
Angut 40-nik ukioqartoq tigusarineqarpoq parnaarunneqarlunilu marsip tallimaani. Pillaatisiani Nunatta Eqqartuussivianut ingerlateqqissanerlugu pillaatiniluunniit attatiinnassanerlugu ulluni 14-ni aalajangernissaminut periarfissinneqarpoq.