Kinguaassiutitigut atornerluinermut akiuiniarneq

Qanittumi nuna tamakkerlugu aallakaatitaq toqqaannartoq ”Meeqqat tamarmik atornerlugaanermut illersorneqarnissamut pisinnaatitaaffeqarput”-mik qulequtalik nalunnginneqarluartunit, NAKUUSA sinnerlugu, Stina Skiftemit taavalu Nathan Kreutzmannimit ingerlanneqartoq malinnaavigineqarsinnaajumaarpoq.

Aningaasat katersat, angajoqqaanut inersimasunullu qanigisaasunut, meeqqat kinguaassiutimikkut atornerlugaasimanerinni pasitsaassaqarnerinni tassungalu paasissutissanik sakkussiassanik pilersitsinissamut atorneqassapput.

- Suliaq pingaaruteqaqaaq, ajoraluartumilli suliniuteqarnissaq pisariaqarluinnarpoq. Taamaattumik qanigisaasut eqqugaariasaarnissaannut upalungaarsornissaat pingaartipparput, aqqusaagaqariasaassappatami qanoq suliniuteqarnissaat paasissutissiissusiarissallugu pingaaruteqarmat, Najaaraq Møller taamatut oqaluttuarpoq.

Katersuiniarneq TV-ikkut takutinneqarnerani isiginnaartut 50 koruuninit 150 koruunit tungaannut tunissutqarlutik sms-ikkut tapiissuteqarsinnaassapput. Isiginnaartut aammma Facebookikkut akitsorterussinerni pisisinnaassapput.

Atuaruk: Nakuusa: Meeqqat affaasa maanna pisinnaatitaaffitik ilisimavaat

Ingerlatsisut taakku marluk tallimanngornermi marsip pingajuanni KNR-imi aallakaatitsissapput.

- Akunnerni pingasuni toqqaannartumik aallakaatitsinissamut siuttuuffigisassatsinnut akuersivugut, qulequtarineqartormi nunatsinni tamanut attuimmat, Stina Skifte oqarpoq.

Atuaruk: Piniartunut aalisartunullu aningaasanik katersuiniarneq

Nathan Kreutzmannili aamma nangaarianngivilluni aallakaatitamut oqaluttuusussap aappaattut aperineqarami angersimavoq.

- Meeqqat inuusuttullu isumassuinissaq pineqartillugu tamavitta inuiaqatigiinni akisussaaffeqarpugut. Stinalu marluulluta filmiliutip saavani oqariartuummik apuussisuusinnaakuttoorpugut, uungalu taamaaliorusulluinnarpunga, Nathan Kreutzmann oqarpoq.

Suleqatigiissitap siunertarivaa nunatsinni meeqqat inuusuttullu pisinnaatitaaffii patajaallisarnissaat. NAKUUSA Namminersorlutik Oqartussanit, Unicef Danmarkimit aningaasaateqarfinniillu aningaasalersorneqarpoq.