Qaanaaq
Piniartunut aalisartunullu aningaasanik katersuiniarneq
Piniartut aalisartullu Nunatsinni illoqarfiit avannarpasinnerpaami anorersuarnerani piniutitik annaavaat. Maanna eqqugaasunut katersuiniartoqalerpoq
Sapaatip-akunnerani kingullermi Qaanaami ulussaarsuarpoq, tamannalu piniartut aalisartullu arlallit piniutiminnik annaasaqarnerannik kinguneqarpoq.
Anorip sakkortussusaa sekundimut 48 meterinik sukkassuseqalertarpoq, anorersualerneranilu issisiut minus 45 gradimiippoq.
Eqqugaasut ikiorniarlugit maanna katersuiniarnermut ataatsimiititaliamik pilersitsisoqarpoq, 'Piutaarsersimasunut Komité'.
Atuaruk: Qaanaami anoraasuarsuaq: - Tupinnaqaaq
Inuit aqqaneq-marluk annertuumik eqqugaasut
- Piniartut aalisartullu piffissami artornartumi ikiorniarlugit ataatsimiititaliamik pilersitsivugut, attaveqarfiusoq Rasmine Jeremiassen Normann, Sermitsiaq.AG-mut oqarpoq.
Piniartut aalisartullu atortut 100.000 koruuninik naleqartut annaasimagaat, taanna ilisimatitsivoq, inuillu aqqaneq-marluk missaaniittut annertuumik eqqorneqarsimasut.
Soriarsinnaanngitsut
- Kikkut tamarmik ikiussagaatigut neriuutigeqaarput. Nunanut allanut katersuiniartoqartareerpoq, Nunatsinnilu maanna immitsinnut ikiornissatsinnut piffissanngortoq isumaqarpugut, taanna erseqqissaavoq.
- Eqqugaasut soriarsinnaanngillat. Juulli qallivoq, eqqugaasullu imaaliallaannaq aalisariarsinnaanatillu piniariarsinnaanngillat. Maanilu qimussimik snescooteriniunngitsoq piniariartoqartarpoq, arlallillu qimmiaqqanik annaasaqarput. Taamaammat tapersersorneqarnissatsinnik pisariaqartitsivugut, Rasmine Jeremiassen Normann oqarpoq.
Eqqugaasut ikiorniarlugit aningaasaateqarfinnut aamma qinnuteqarsimallutik taanna ilisimatitsivoq.