Kommunimut qinersineq 2017
Kim Kielsen Siumumi avissaartuuttoqarnerani eqqissisaasoq
Enok Sandgreen Nikolaj Jeremiassenilu partiip siulersuisuuneranit taperserneqarnissaminnik ilimasussanngillat. Enok Sandgreen borgmesteritut amerlanerussuteqartunit taperserneqanngilaq. IA-mullu arfininngonerup unnuaani suleqatigiinnissamut atsioqatigiittoqarmat peqataatinneqaratik.
Qaasuitsoq Kujallermi Siumup iluani pissaaneqarniuunneq killilerlugu partiit siulittaasuata Kim Kielseni ammasumik ima allagaqarpoq:
Aamma atuaruk: Qaasuitsoq Kujallermi inuussutissarsiorneq nukittorsarniaraat
- Matumuuna nalunaarutigineqassaaq isumaqatigiinniarnernik ingerlatsisimanerit ilanngullugit nalilersuutigereerlugit Siumup Siulersuisuunerisa Siumup Inuit Ataqatigiillu suleqatigiinnissamik isumaqatigiissutaat tusaatissatut tigummassuk. Siulersuisuunerit suleqatigiilluarnissassinnik angusaqarluarnissassinniullu kissaappaasi.
Taamaasilluni Otto Jeremiassen Inuit Ataqatigiinnut isumaqatigiissusiornerminik pisoqagaatsiarfiusumilu siulittaasumit tamakkiisumik taperserneqarpoq.
Isumaqatiginninniarnermi aqutsisoq
Otto Jeremiassen isumaqatiginninniarnermi aqutsisussatut qinigaaqatiminit tallimaasunit toqqarneqarpoq. Isumaqatiginninniarnerullu piareeriartornerani kina borgmesterimut sinniisutut siullertut Ane Hansenip borgmesterilerfigiumaagaani inississanersoq pissanngatigineqarluni.
Jess Svane kommunimi Siumumeersunit qinigaanerpaagami ilimagineqaraluarpoq. Taamatulli pisoqanngilaq, maannalu Kim Kielsenip allagaqareernerani Qaasuitsoq Kujallermi Siumut partiiani aporaannerit qaangiusimalertut paasinarsivoq.
Aamma atuaruk: Otto Jeremiassenip borgmesterip sinniisuatut toqqarneqarnera isumaqatigiissutaasoq
Enok Sandgreen Nikolaj Jeremiassenilu qanoq piumaarnerat suli ilisimaneqanngilaq. Amerlanerussuteqartut tapersissaneraat Siumumiilluunniit tunuassanersut.