kommuninut qinersineq 2017

Otto Jeremiassenip borgmesterip sinniisuatut toqqarneqarnera isumaqatigiissutaasoq

Siumi ilaasortaasut tallimat akornanni Otto Jeremiassenip borgmesterimut sinniisunngortinneqarnissaa isumaqatigiissutigineqarpoq

Borgmesterinngortitsinermut tunngatillugu qinigassanngortittoq taaguunneqarnerpaasoq borgmesterinngortarnissaa Siumumi ileqquuvoq.

Inissitsiternermut isumaqatigiissuteqarnermut atatillugu taamaattariaqanngilaq, Otto Jeremiassen nassuiaavoq.

- Borgmesterip sinniisuanut apeqqut peqqissaartumik oqaloqatigiissutigaarput, gruppillu isumaqatigiittup toqqarmannga suliassamut akuersivunga, Otto Jeremiassen Sermitsiaq.AG-mut oqarpoq.

Taassuma inissitsiternermi isumaqatigiissutip imarisai nuannaarutiginerarpai.

- Isumaqatigiissutip imarisai tamarluinnaasa Siumumi Inuit Ataqatigiinnilu isumaqatigiissutigineqarluinnarput, Otto Jeremiassen oqarpoq.

Atuaruk: Otto Jeremiassen borgmesterimut sinniisunngorpoq

Inuussutissarsiornikkut sulisoqarnikkullu pilersitsineq kommunimi nutaami ukiuni sisamani tulliuttuni pingaarnertut suliassatut isigai.

Siumumi amerlanerussuteqartut partiimi anisut Enok Sandgreen aamma Nikolaj Jeremiassen attaveqarfigissallugit iluatsinngilaat.

Taakku marluullutik Naja Petersen Atassummeersoq isumaqatigiissuteqarfigaat, tamatumalu Enok Sandgreenip borgmesterinngornissaa qulakkeertussaagaluarpaa, naak Jess Svane taaguunneqarnerpaagaluartoq.

- Arlaleriarluta SMS-erfigalugillu sianerfigisaraluarpagut, kisianni akissuteqarfigineqanngilagut, Otto Jeremiassen oqarpoq.

Powered by Labrador CMS