Siorarsiorfik
Kim Kielsen: Nuuk ineriartorsinnaavoq - akisussaaffeqartumik
Illoqarfiit pingaarnersaata Nuup ineriartortinneqarnissaa angulluarneqarsinnaavoq, Siumup siulittaasua Kim Kielsen oqarpoq. Ineriartortitsinerli nunatsinni sumiiffiit allat inangerlugit pissanngilaq, taanna oqarpoq.
IA-meersup borgmesterip Asii Chemnitz Narupip februaarip 7-anni kommunalbestyrelsi isumaqatigiittoq sinnerlugu illoqarfiup ineriartortinneqarnissaanut pilersaarut annertooq saqqummiussaa pillugu Siumup siulittaasuata Kim Kielsenip oqaaseq ''isumaannakkut pilersaarut'' atorpaa.
Aamma atuaruk: Kielsen Nuummi suliniut pillugu: Isumaannakkut pilersaarut
Suliniut Siorarsiorfimmik taaguuteqartoq inissianik 1600-nik, atuarfimmik, paaqqinnittarfimmik sullorsuarmik, inuussutissarsiortunut inissianik pilersaarutitaqartoq issuttumilu arsaattarfissuaq 4-5 milliardit koruuninik akeqassasoq, Kommuneqarfik Sermersuup nalilerpaa.
Aningaasat pigineqassapput
- Nuummi illoqarfiup inerikkiartornissaa projektiliatut isigalugu taamatorsuaq angissuseqassappat taava pinngitsoorani aamma naammalluinnartunik aningaasassaqartariaqarpoq. Tamatumani aamma minnerunngitsumik nuuttussat tamaasa eqqarsaatigalugit suliffissaqareertariaqarput. Nuup ineriartornissaa tapersersorparput. Aningaasatigullu isertitassavut aamma malinnaasaria-qarput ineriartornerlu pineqartoq tunngaveqarluinnartariaqarpoq, Kim Kielsen Sermitsiaq.AG-mut mailikkut allappoq.
Atuaruk: Nunatta oqaluttuarisaanerani inissianut pilersaarut annerpaaq
- Siumup ineriartornissamut ataatsimut isigalugu politikkia naapertussagaanni, taava tuiit silinnerit soorunami aamma allanut naleqqiullugit nammataqarnerusariaqarput. Tamannami Nunatsinnut tulluarnerpaajuvoq, ilami nunatta immikkoortuisa ilaat ingerlalluarpata, taava ”nammaqatigiinneq” pilersarpoq, Nunattalu ataatsimut isigalugu nammaqatigiinnikkut atsaat inerisarneqarsinnaavoq, imaanngitsoq Nunap immikkoortua ataaseq sinneri inangerlugit unitsissagai, partiimi siulittaasoq naqissusiivoq.
Siumut ineqarnermut pilersaaruteqarpoq
Inissaaleqinerup anigornissaanut tigussaasunik arlalinnik siunnersuutissaqareerlutik taanna ilisimatitsivoq, ''allaallumi inissaqarniarnitta sukkasuumik qaangeriartornissaannut siunnersuutissaqareerluta''.
Kim Kielsenip inissanut pilersaarutit maanna saqqummiunnianngilai, kisianni apriilip sisamaanni kommunimut qinersinissaq sioqqullugu qinersisartunik ataatsimiititsinerni pilersaarutit oqaluttuarinissai qilanaaraa.
Aamma atuaruk: Inissialiornissarsuaq soraarnerussutisianut aningaasaateqarfinnit aningaasalersorneqassaaq
- Eqqartugassavut aningaasassaqareerput, aammalumi pivisusunngortariaannaallutik. Inissiat inuusuttunut angerlarsimaffeqanngitsunullu taamaallaat ukiut sisamakkaarnerini eqqartortassanngilagut, qinersisoqaliivikkaangat atsaat, Kim Kielsen oqarpoq.