aaqqissuusseqqinneq
Kim Kielsen: Aaqqissuusseqqinnerit saqqummiunneqassapput
Susassaqarfinni taaneqartuni iliuusissat ataasiakkaat Inatsisartut upernaaq manna ataatsimiinneranni saqqummiutissallugit naatsorsuutigaarput, Naalakkersuisut siulittaasuat oqarpoq.
Sapaatip akunnerata siuliani Sermitsiaq.AG-p Demokraatit siulittaasuata Randi Vestergaard Evaldsenip Naalakkersuisut aaqqissuussinernernik pisarialinnik tukkumassinnginnera ernummatigigaa allaaserinnippoq.
- Piumassuseqannginneruvallaaqaaq angusaqarluarniannginneruvallaarlunilu, Naalakkersuisut akissuteqaataannut pakatsisimaqaluni Demokraatit siulittaasuat taama oqarpoq.
Atuaruk: D: Iluarsartuussinernik aallarteriarta
Suliniutit assigiinngitsut suliarineqarput
Naalakkersuisulli siulittaasuata Kim Kielsenip (S), Demokraatit siulittaasuat Randi Vestergaard Evaldsen ernumassutissaqannginnerarpaa. Naalakkersuisummi inatsisissanut siunnersuutissat nalunaarutissallu Inatsisartunut saqqummiutinnginnerini inaarutaasumik suliaringaat erseqqissaatigaa.
- Inatsisissatut siunnersuutit 20-nit amerlanerusut piareersarneqarput taakkulu saniatigut inuiaqatigiinni aningaasarsiorneq siunissamilu aningaasarsiornikkut anguniakkat oqaluuserineqarnissaannut Aningaasaqarnermik ingerlatsineq pillugu nalunaarusiaq saqqummiunneqassalluni, Kim Kielsen erseqqissaavoq.
Atuaruk: Kim Kielsenip aaqqissuusseqqinnissamut pilersaarutit oqaluttuarinianngilai
Kikkut tamarmik ilisimasassarinngilaat
Aaqqissuusseqqinnissanut pilersaarutit suliarineqartut suunersut kikkut tamarmik ilisimasassarinngikkaat Kim Kielsen isumaqarpoq.
- Pilersaarutit tamakku tamanut saqqummiunneqarnissaat pillugu Naalakkersuisuni aalajangiussinissatta tungaanut Naalakkersuisut akunnitsinniinnaq ilisimasinnaatitaagivut isumaqarama. Aaqqissuusseqqinnissamut tunngatillugu suliat isertuussassaanngillat. Kisianni tamanut saqqummiunneqarnissaat sioqqullugu naammassillugit suliareqqaagassaapput politikikkullu oqaluuserineqaqqaarsimassallutik. Naalakkersuisullu pisinnaatitaaffigaat namminneerlutik aalajangissallugu siunnersuutiginiakkatik qaqugu qanorlu periaaseqarluni saqqummiunneqassanersut, Kim Kielsen nassuiaavoq.
Aaqqissuusseqqinnerit pisariallit
Aaqqissuusseqqinnernillu Randi Vestergaard Evaldsenip ujartuineranut isumaqataavoq.
Naalakkersuisut aaqqissuusseqqinnissanut pisariaqartuni pingaartitaat tassaapput aalisarneq, ilinniartitaaneq kiisalu meeqqat inuusuttullu atugaasa iliuuseqarfiginissaat.
Inatsisiliornerup saniatigut Naalakkersuisuni qinigaaffimmi matumani anguniagassatut susassaqarfinni taaneqartuni aaqqissuusseqqittoqarnissaa taamaammat anguniassallugu aalajangerpugut, Naalakkersuisut siulittaasuat Kim Kielsen taama oqarpoq.
Atuaruk: Professori: Politikerit ajornartorsiutit saaminnut ajattorpaat