iluarsartuussinerit
D: Iluarsartuussinernik aallarteriarta
Demokraatit siulittaasuata Naalakkersuisut iluarsartuussinernik pilersaaruteqannginnerat aallartinnissaannut ernumassuteqarpoq.
Aningaasaqarnermut Siunnersuisoqatigiit arlaleriarlutik iluarsartuussinerit arriippallaarnerarlugit ukiumoortumik nalunaarusiaminni naqissusersimavaat.
Naalakkersuisulli Siulittaasuata Kim Kielsen (S), Demokraatit siulittaasuaannut Randi Vestergaard Evaldsenimut akissuteqaammini iluarsartuussinerit tuaviortumik suliarineqassanersut paasissutissiarinngilaa.
Iluarsartuussinerilli maanna aallartittariaqartut, Demokraatit siulittaasuat Randi Vestergaard Evaldsen isumaqarpoq.
Atuaruk: Kim Kielsenip aaqqissuusseqqinnissamut pilersaarutit oqaluttuarinianngilai
Piumassuseqannginneruvallaaqaaq angusaqarluarniannginneruvallaarlunilu
- Ernumanaqaaq Naalakkersuisut pilersaaruteqarpasinngimmata iluarsartuussinerit avaqqunneqarsinnaanngitsut aallartinnissaannut, siunissami uangut inuiaqatigiit atungartuujunissatsinnut aamma aningaasaqarnitsinnut politikkikkut namminersulivinnissatsinnut tunngaviliisussamut qularnaarisussat. Piumassuseqannginneruvallaaqaaq angusaqarluarniannginneruvallaarlunilu, Demokraatit siulittaasuat Randi Vestergaard Evaldsen tusagassiuutinut nalunaarummini allappoq.
Iluarsartuussinernik partiit Naalakkersuisunut suleqataarusussuseqartut erseqqissaatigaa. Naalakkersuisulli Siulittaasuata akissuteqaatai pakatsissutigalugit.
Randi pilersaarutissinnik oqaluttuutilaariartigut
Apeqqutinnut akissutiminni Naalakkersuisut oqaatigaat iluarsartuussinissamut sunnguamilluunniit suliniuteqaratik.
Naalakkersuisut oqaatigaat isumaqarlutik Inatsisartuni ilaasortap apeqqutaa piinnarlugu siunissami iluarsartuussinissanut Naalakkersuisut nassuiaateqartariaqaratik.
- Arraa, sunaana asuli oqalunneq avaqqutaarinerlu taama ingasatsigisoq? Inuiaqatigiit oqaluttuuteriassagisi suut orninneraat. Atagu pilersaarutissinnik oqaluttuutilaariartigut, Demokraatit siulittaasuat oqarpoq.
Pitsanngorsaatinik ujartuivoq
Iluarsartuussinerit aallartinneqassasut Randi Vestergaard Evaldsenip neriuutigaa.
- Pisortat ingerlatsivii tamaasa pitsanngorsariartigit, malunnartumik minnerulersillugit.Ingerlatseqatigiiffinnut akileraarut appariartigu, nunaqavissut suliffiutaat suliffissanik pilersitsiortornissaminnut periarfissarissaarneruleqqullugit. Sulineq aningaasatigut pilerinarnerulersitsigu.
- Inunnik isumaginninnerup iluani ikiorsiissutit misissorluariartigit siunertaralugu immikkoortup tamatumap sipaarfiginissaa. Ilulissani Nuummi timmisartunut suluusaslinnut mittarfiit tallinissaat aningaasaliiffigeriartigit aamma Tasiilami Qaqortumilu mittarfissat nutaat, angallanneq ataqatigiilluarneruleqqullugu, Demokraatit siulittaasuat oqarpoq.
Atuaruk: Professori: Politikerit ajornartorsiutit saaminnut ajattorpaat